Фота: faltublog.com
Фінская кампанія Nokia пацвердзіла планы пакупкі французскай Alcatel-Lucent, перадае Yahoo News.
Пакупка зробіць Nokia адным з найбуйнейшых пастаўшчыкоў тэлекамунікацыйнага абсталявання побач з Ericsson і Huawei.
Паводле ўгоды, уладальнікі Alcatel атрымаюць акцыі аб’яднанай кампаніі Nokia Corporation на суму 15,6 млрд еўра («алкатэлеўцы» будуць мець 33,5% акцый). Гендырэктарам кампаніі стане цяперашні кіраўнік Nokia Раджыў Суры, але ў раду дырэктараў увойдуць тры прадстаўнікі Alcatel-Lucent.
Плануецца, што ўгода будзе закрытая ў 2016 годзе.
***
У 2013 годзе Microsoft набыла за 5,4 млрд еўра самую вядомую частку Nokia, яе тэлефонны бізнес. Тэлефонны брэнд Nokia быў ліквідаваны — Microsoft працягнула выпуск смартфонаў Lumia, але пад уласным брэндам. Nokia захавала ўсе іншыя падраздзяленні, у ліку якіх адказнае за выпуск простых тэлефонаў-«званілак», і нават паспрабавала выпускаць планшэты на Android.
