Адносна нядаўна баявыя беспілотныя лятучыя апараты сталі героямі баявых дзеянняў, але звычайна яны дагэтуль адносна невялікія, трымаюцца ў паветры не так доўга, як класічныя баявыя самалёты, нясуць менш узбраенняў.
X-47B кампаніі Northrop Grumman — удзельнік праграмы па стварэнні баявога авіяноснага беспілотніка; wikipedia.org
Аднак прагрэс у гэтай сферы ідзе імклівым тэмпам. Два гады таму баявы беспілотнік X-47B упершыню сеў на авіяносец. Год таму дрон першы раз у гісторыі авіяцыі лятаў у групе з пілатаванымі знішчальнікамі F/A-18. У гэтым месяцы, як чакаецца, той ж X-47B зробіць яшчэ адзін этапны крок — правядзе дазапраўку ў паветры.
Пры гэтым ваенныя аналітыкі і ўплывовыя сябры Кангрэсу ЗША лічаць, што новыя распрацоўкі ў гэтай сферы далёка не дасягнулі максімуму, піша washingtonpost.com.
Група амерыканскіх заканадаўцаў, у якую ўваходзіць рэспубліканскі сенатар Джон МакКейн, звярнулася да Пентагона з прапановай стварыць цяжкі беспілотнік дальняга дзеяння з выкарыстаннем тэхналогій стэлс, здольны несці сур'ёзнае ракетна-бомбавае ўзбраенне і базіравацца на авіяносцах.
Гэта, на думку кангрэсменаў, захавае марское і паветранае панаванне ЗША нават у сітуацыі, калі патэнцыйныя праціўнікі пераўзброяцца новымі пакаленнямі супрацькарабельных і зенітных ракет.
У лісце да міністра абароны Эштана Картэра МакКейн, кіраўнік Камітэта Сенату па ўзброеных сілах, зазначыў, што трэба: «Забяспечыць, каб першы баявы беспілотны апарат ваеннага флоту ЗША мог не толькі праводзіць працяглыя разведвальныя і назіральныя і рэкагнасцыровачныя палёты, але і наносіць удары з авіяносцаў з бяспечных адлегласцяў».
Падобныя машыны, калі яны, не абмежаваныя магчымасцямі арганізма чалавека-пілота, будуць здольныя весці працяглую баявую варту ў небе, могуць заўважна змяніць саму канцэпцыю баявых дзеянняў. Улічваючы магчымасць дазапраўкі, яны будуць здольныя быць у любой кропцы планеты і знішчыць там практычна любога праціўніка. Пры гэтым, калі цэль будзе дастаткова важнай і добра абароненай, супраць яе можна будзе выкарыстаць адразу шмат беспілотнікаў, не рызыкуючы жыццямі вайскоўцаў.
