Скрыншот: MacRumors
У аперацыйнай сістэме iOS карыстальнік reddit пад нікнэймам that_c00l_kid знайшоў баг: тэкставае паведамленне на арабскай мове здольнае сур’ёзна нашкодзіць карыстальнікам iPhone.
Калі праз SMS, iMessage ці іншыя мэсэнджары адаслаць пэўны набор арабскіх сімвалаў, тэлефон сыйдзе ў так званы рэспрынг (перазагрузку сістэмнай абалонкі), а iMessage можа пачаць «вылятаць» пры запуску.
Падобна, што памылка актуальная для iOS 8, але пра іншыя версіі звестак няма. Як вынайшлі блогеры, баг звязаны з кадыроўкай Unicode. Як піша Apple News у твітары, распрацоўшчыкі Apple ужо ведаюць пра памылку. Магчыма, яна будзе выпраўленая ў бліжэйшым абнаўленні.
Каб пазбавіцца ад памылак, калі вы атрымалі такое паведамленне, існуе некалькі спосабаў.
Калі размова, у якой прыйшло паведамленне, была ўжо адкрытая на той момант, трэба проста паспрабаваць напісаць любы адказ.
Калі размова не была адкрытая, а iMessage завісае пры запуску, трэба папрасіць іншага карыстальніка прыслаць новае паведамленне ці зрабіць гэта самому праз функцыю «падзяліцца» ў іншай праграме ці праз галасавога асістэнта Siri.
