Генадзь Падалка. Фота з сайта today.kz
Расійскі касманаўт Генадзь Падалка пабіў рэкорд 10-гадовай даўніны па сумарным часе знаходжання на арбіце, паведамляе NASA.
Папярэдні рэкорд 2005 года належыў расійцу Сяргею Крыкалёву, які прабыў у космасе 802 дні. Падалка на сёння знаходзіцца ў космасе ўжо 806-ы дзень і вернецца на Зямлю толькі 11 верасня.
Калі не здарыцца затрымак, 57-гадовы Падалка на момант вяртання правядзе ў космасе 877 дзён. Папярэдні рэкардсмен, Крыкалёў, ужо паабяцаў асабіста павіншаваць Падалку па вяртанні.
Упершыню Падалка паляцеў у космас на станцыю «Мір» у якасці камандзіра карабля Саюз-ТМ-28 у 1998 годзе. Затым яшчэ чатыры разы лётаў на МКС у якасці камандзіра Саюзаў. Не раз працаваў у адкрытым космасе па 5 з лішнім гадзін. Герой Расійскай Федэрацыі. На Зямлі цікавіцца тэатрам, дайвінгам і парашутным спортам.
