Праз гарачы антыцыклон працягваюць абнаўляцца тэмпературныя рэкорды.
7 жніўня новыя максімумы дня зарэгістраваны ў Мінску — плюс 33,8 градуса (было 33,6 у 2010 годзе), Брэсце — 35,1 (34,7 у 1952 годзе) і Гродне — 34,1 (33 у 1971 годзе). Пры гэтым у сталіцы і Гродне новыя рэкорды ўстанаўліваюцца другі дзень запар.
Цяплей за ўсё было ў пятніцу ў Івацэвічах (Брэсцкая вобласць) і Жыткавічах (Гомельская вобласць) — 35,2 градуса. У першым райцэнтры рэкорд пабіты (было 32,1 у 2010 годзе), у другім — выстаяў (35,7 таксама ў 2010 годзе).
У Віцебску, Магілёве і Гомелі рэкорды, устаноўленыя ў анамальна гарачым жніўні 2010 года, засталіся ранейшымі (пяць гадоў таму цяплей было ва ўсходняй палове краіны, цяпер — у заходняй).
8 жніўня сінаптычная сітуацыя не зменіцца. Днём будзе ад 30 да 36 градусаў вышэй за нуль.
(Выкарыстаныя дадзеныя рэсурсаў надвор'я meteoinfo.by і hmc.by.)
