Выпадак адбыўся ў Валожыне сёлета на пачатку лютага. Распавяла пра яго следчая Валожынскага РАСК Дар’я Мікуліч.
32-гадовы валожынец прыйшоў да знаёмага пазычыць алкаголь. Калі яму адмовілі, мужчына не прыдумаў нічога лепшага, як скрасці ў гаспадара курткі. Ён ведаў, што гаспадар захоўвае іх у сябе ў падвале.
Забраўшы рэчы, мужчына вырашыў далёка не хадзіць у пошуках пакупніка. Ён зноў звярнуўся да гэтага свайго знаёмага і прапанаваў яму купіць курткі за алкаголь. Той асабліва не разглядаў, што набывае, пагадзіўся і даў спіртное.
На наступны дзень ён заўважыў, што з падвала зніклі рэчы. Тады ён агледзеўся і зразумеў, што купіў уласныя курткі.
Пацярпеламу 72 гады.
Абвінавачаны раней прыцягваўся да адказнасці за нявыплату аліментаў. Крымінальная справа накіраваная ў суд.
Праводзіцца праверка ў адносінах да пацярпелага па факце продажу алкаголю.