Брытанскія аматары сярэднявечнай гісторыі афіцыйна абвесцілі сваю прапанову зрабіць рыцарскі бой на коп'ях алімпійскім спортам, піша Reuters.
Фота Reuters.
Самым распаўсюджаным відам рыцарскага спаборніцтва на турнірах быў бой на коп'ях — калі два рыцара у даспехах скачуць насустрач і намагаюцца выбіць адзін аднаго з сядла.
«Бой на коп'ях варта прызнаць еўрапейскім баявым мастацтвам і дадаць да алімпійскіх відаў спорту», — лічыць сучасны прафейсійны турнірны баец Дамінік Сьюўэл.
«Зараз турніры праводзяцца ад Расіі да Аўстраліі і заходняй Каліфорніі. Капейныя баі робяцца сапраўдным міжнародным спортам», — дадае ён.
Сьюўэла падтрымлівае дабрачынны фонд English Heritage, які фінансуе гістарычныя помнікі, замкі і іншыя памятныя месцы. English Heritage склаў адпаведную анлайн-петыцыю.
Энтузіясты адзначаюць, што з «калятурнірных» відаў спорта алімпійскімі ўжо з'яўляюцца фехтаванне, конныя віды спорту і нават стральба з лука. А рыцарскія даспехі і коп'я могуць лічыцца такім жа спартыўным рыштункам, як рыштунак фехтавальшчыкаў.
