Хасан Рухані, Ільхам Аліеў і Уладзімір Пуцін. Фота: прэс-служба прэзідэнта Расіі.
Трохбаковы саміт прэзідэнтаў Азербайджана, Ірана і Расіі прайшоў упершыню. У лютым правесці яго прапанаваў прэзідэнт Азербайджана Ільхам Аліеў. У Маскве ініцыятыву падтрымалі. Аліеў сустракаў гасцей у сучасным Цэнтры мастацтваў імя свайго бацькі Гейдара Аліева, пабудаваным па праекце вядомай архітэктаркі Захі Хадыды.
«Усе дзяржавы сутыкаюцца з падобнымі праблемамі: глабальны эканамічны крызіс, напружанне ў значнай ступені прысутнічае на нашых межах», — заявіў на паседжанні Уладзімір Пуцін. У гэтых умовах Расія ў гэтым фармаце лічыць неабходным узмацніць абмен інфармацыяй аб дзейнасці тэрарыстычных арганізацый, каб эфектыўна адсочваць трафік зброі і тэрарыстаў, заявіў Пуцін.
«Ні адна краіна не можа ў адзіночку супрацьстаяць цяперашнім выклікам», — быў салідарны прэзідэнт Ірана Хасан Рухані. Ён падкрэсліў, што новы фармат супрацоўніцтва не накіраваны «супраць іншай дзяржавы, а стварае рамкі для рэгіянальнага супрацоўніцтва нашых дзяржаў».
Краіны дамовіліся паглыбляць супрацоўніцтва ў супрацьдзеянні тэрарызму і экстрэмізму, а таксама развіваць эканамічнае супрацоўніцтва, у тым ліку падтрымалі аб'яднанне электраэнергетычных сетак.
Новы фармат адкрывае магчымасць супрацоўніцтва ў шырокім спектры абласцей: ад палітычнай каардынацыі да абмеркавання канкрэтных праектаў з акцэнтам на транспарт і энергетыку, распавёў на прэс-канферэнцыі міністр замежных спраў Сяргей Лаўроў.
«У глабальным маштабе вельмі важная сустрэча прайшла», — не паскупіўся на пахвалу азербайджанскі міністр замежных спраў Эльмар Мамедзьяраў. Наступная сустрэча адбудзецца праз год у Іране, а да гэтага бакі дамовіліся на працягу года працягваць кансультацыі на ўзроўні ведамстваў, правесці трохбаковае паседжанне кіраўнікоў міжурадавых камісій.
