Бурыя плямы на плячах 21-разовага алімпійскага чэмпіёна Майкла Фэлпса — сляды ад банек.
Банькі выкарыстоўваюць дактары амерыканскай каманды, каб здымаць мускульнае напружанне.
Каму што баліць, той пра тое і гаворыць — расійскія СМІ сустрэлі гэтую навіну крытыкай. «Эфект ад такіх працэдур шмат у чым падобны з дзеяннем мельдонію, праз які дзясяткі расійскіх спартоўцаў страцілі здабытыя ўзнагароды і былі дыскваліфікаваныя», — заявіў тэлеканал Расія-24.
Па-навуковаму дактары называюць банькі «вакуумным масажам».
У Беларусі раней банькі рэкамендавалі дактары пры прастудных, лёгачных захворваннях. Яны былі ў кожнай хаце, як і гарчычнікі. Цяпер мода на банькі мінулася ў нас, а вось у ЗША — наадварот. Па-ангельску гэта называецца cupping. Традыцыйныя нашы шкляныя банькі падагравалі запалкай, перш чым ставіць. У амерыканскіх дактароў банькі сучасныя, высокатэхналагічныя.
Сэнс у чым — банькі разганяюць кроў, паляпшаюць рух крыві ў месцах, куды іх ставяць.
Правілы не забараняюць такой фізіятэрапіі.
Многія людзі не вераць у эфект банек. Фэлпс — верыць. І перамагае.