Новы для Беларусі від жывёл, раней не ўласцівы нашай краіне, зафіксаваны ў Бераставіцкім раёне, дзе выявілі некалькіх шакалаў. Пра гэта паведаміў інжынер-паляўніцтвазнавец Ваўкавыскага лясгаса Анатоль Пронін.

Ілюстрацыйнае фота: parameter.sk

Адзін з шакалаў трапіў пад аўтамабіль. Анатолю Проніну нават удалося захаваць галаву гэтай жывёлы.

«Я выехаў на месца, людзі паведамлялі пра тое, што каля вёскі Грыцэвічы збілі ці то ваўка, ці то сабаку. Жывёла і афарбоўкай, і формай галавы, цела, хваста больш за ўсё была падобная менавіта да шакала. Я раней служыў у Сярэдняй Азіі, таму добра ведаю гэтых жывёл», — растлумачыў інжынер-паляўніцтвазнавец. Фатаграфіі ён адправіў у Акадэмію навук, там пацвердзілі, што хутчэй за ўсё на здымку шакал. Праўда, папрасілі захаваць галаву жывёлы для таго, каб пасля яе вывучэння зрабіць канчатковыя высновы.

Загінулая жывёла — маладая самка. Пасля гэтага сам Анатоль Пронін бачыў самца-шакала, а мясцовыя жыхары распавялі, што раней заўважалі самку з вывадкам маладых шчанят. Менавіта са з'яўленнем шакалаў звязваюць і некаторыя напады на свойскую жывёлу, у прыватнасці авечак.

«Шакал афарбоўкай падобны да ваўка, праўда, куды меншы памерам. Здалёк яго можна зблытаць з бадзяжным сабакам. Ён можа жыць побач з населеным пунктам і не трапляцца на вочы чалавеку. Жывёла усяедная, сілкуецца як падлай, так і бахчавымі культурамі ці нават апалымі яблыкамі. Палюе шакал на зайцоў, маладых казуль, парсюкоў і палявую птушку», — адзначыў Анатоль Пронін. Ён падкрэсліў, што для чалавека можа быць небяспечны толькі хворы на шаленства шакал. Зрэшты, жывёла цалкам здольная пранікнуць у вёску і паласавацца свойскім быдлам.

Цяпер у Бераставіцкім раёне чакаюць прыезду экспертаў, якія вывучаць і парэшткі загінулай жывёлы, і месцы, дзе бачылі шакалаў. Пасля гэтага будзе прынятае рашэнне, як з імі паступіць. Раней шакалы ў дзікай прыродзе ў Гродзенскай вобласці не сустракаліся.

Клас
Панылы сорам
Ха-ха
Ого
Сумна
Абуральна

Хочаш падзяліцца важнай інфармацыяй ананімна і канфідэнцыйна?

Каб пакінуць каментар, калі ласка, актывуйце JavaScript у наладах свайго браўзеру