19 верасня распачаўся збор подпісаў за наданне бел-чырвона-беламу сцягу статуса нематэрыяльнай гісторыка-культурнай каштоўнасці.
«Наша Ніва» наведала пікет, які штодня будзе знаходзіцца ў пераходзе станцыі Кастрычніцкай.
«Я планую збіраць подпісы кожны дзень апроч нядзелі, — распавядае Зміцер Дашкевіч. — У планах — сабраць не менш за тысячу подпісаў. Пасля работы я стаю на выхадзе з метро «Купалаўская» ў бок крамы «Цэнтральны», і штогадзіну падпісваецца каля дваццаці чалавек. Да кампаніі пачынаюць далучацца і іншыя актывісты. Мяркуецца, што праз месяц мы панясём подпісы да Міністэрства культуры», — кажа Дашкевіч.
Ахвотных паставіць подпіс даволі шмат, але некаторыя баяцца. Збольшага гэта студэнткі, але Зміцер тлумачыць ім, што гэта законна, і дзяўчаты пакідаюць свой подпіс. Іншая дзяўчына зазірнула ў бланк, пабачыла, што трэба пакідаць прозвішча, і сышла — праўда, пракрычала «Жыве Беларусь!»
Па гучнай сувязі папрасілі дзяжурнага міліцыянера падысці да касы, праз некаторы час з'явіліся супрацоўнікі міліцыі ў цывільным і пачалі здымаць зборшчыкаў подпісаў на камеру.
Дашкевіч прапаноўвае ўсім ахвотным спампаваць падпісны бланк з асноўнымі фактамі пра каштоўнасць бел-чырвона-белага сцяга. Факты, піша ён, правераныя на адпаведнасць падзеям гісторыкам Уладзімірам Арловым.
Падпісны бланк вы можаце спампаваць па спасылцы padpisny-blank-za-biel-czyrvona-biely-sciah
Дашкевіч прапаноўвае выкарыстоўваць хэштэг #нашсцяг усім, хто далучаецца да кампаніі.
