Пытанне ўвядзення агульнай візы Саюзнай дзяржавы Беларусі і Расіі працягвае прапрацоўвацца, паведаміў журналістам дзяржсакратар Саюза Рыгор Рапота ў Мінску 28 кастрычніка пасля пасяджэння групы высокага ўзроўню Савета міністраў Саюзнай дзяржавы.

Сустрэча пад старшынствам віцэ-прэм'ера Беларусі Васіля Мацюшэўскага і яго расійскага калегі Ігара Шувалава адбылася сёння ў Нацыянальнай бібліятэцы.

«Шмат было размоў пра стварэнне адзінай міграцыйнай і візавай прасторы. Мы дамовіліся, як мы будзем па гэтых пытаннях працаваць», — адзначыў Рапота. Паводле яго слоў, у бакоў ёсць прынцыповая згода ў тым, што існуе неабходнасць увядзення агульнай візы, і «ідэю саму ніхто не адхіляе».

«Я думаю, будзе прынцыповае рашэнне. Ніхто супраць гэтага не пярэчыць, проста пытанне, калі гэта рабіць, на якіх умовах, з улікам якіх фактараў. Вось гэта павінна быць усё зараз вырашанае. Бо працэс інтэграцыі — вельмі працяглы і карпатлівы», — дадаў ён.

Рапота анансаваў правядзенне найбліжэйшым часам двухбаковых кансультацый па гэтым пытанні на ўзроўні міністэрстваў замежных спраў, унутраных спраў і іншых зацікаўленых бакоў.

Дзяржсакратар паведаміў, што на сённяшняй сустрэчы шмат увагі было нададзена пытанню няроўнасці ўмоў гаспадарання на тэрыторыі Саюзнай дзяржавы. «Яшчэ не вырашанае да канца пытанне давання роўных умоў для суб'ектаў гаспадарання, прамысловых прадпрыемстваў, сельгаспрадпрыемстваў на тэрыторыі дзвюх краін. Гэтае пытанне ў нас доўгайграючае, вельмі шмат на гэтым шляху ўжо зробленае, у працяг тэмы сёння таксама ішло абмеркаванне», — сказаў Рапота.

Клас
Панылы сорам
Ха-ха
Ого
Сумна
Абуральна

Хочаш падзяліцца важнай інфармацыяй ананімна і канфідэнцыйна?

Каб пакінуць каментар, калі ласка, актывуйце JavaScript у наладах свайго браўзеру