Завяршылася асноўная перамоўная частка візіту Аляксандра Лукашэнкі ў Аб'яднаныя Арабскія Эміраты.
«3—4 лістапада кіраўнік дзяржавы па запрашэнні эмірацкага боку гасцюе ў наследнага прынца Абу-Дабі, намесніка вярхоўнага галоўнакамандуючага Узброенымі сіламі ААЭ шэйха Мухамеда бен Заіда аль-Нахаяна», — паведаміла прэс-служба кіраўніка беларускай дзяржавы.
Плануецца, што ў суботу, 5 лістапада, адбудзецца заключная сустрэча Лукашэнкі з кіраўніцтвам ААЭ, на якой будуць падведзены першыя вынікі візіту і абмеркаваны канкрэтныя сумесныя праекты, прапрацоўкай якіх бакі займаліся ў гэтыя дні.
Лукашэнка ў ходзе наведвання краін Блізкаўсходняга рэгіёну ажыццявіў афіцыйны візіт у Дзяржаву Катар і рабочы візіт у ААЭ. У Катары ён правёў перамовы з эмірам шэйхам Тамімам бен Хамадам аль-Тані. Бакі дамовіліся надаць новае напаўненне двухбаковаму гандлёва-эканамічнаму і інвестыцыйнаму супрацоўніцтву. Падпісаны пакет дакументаў аб развіцці ўзаемадзеяння ў розных сферах, у тым ліку фінансаў, аховы здароўя, акадэмічнага і навуковага супрацоўніцтва ВНУ. Заключаны мемарандум аб узаемаразуменні паміж банкамі развіцця Беларусі і Катара.
У ААЭ Аляксандр Лукашэнка сустрэўся з Мухамедам бен Заідам аль-Нахаянам. Бакі абмеркавалі кірункі ўзаемавыгаднага супрацоўніцтва дзвюх краін у розных галінах, сярод якіх сферы гандлёва-эканамічнага і інвестыцыйнага ўзаемадзеяння. Лукашэнка таксама правёў перамовы з віцэ-прэзідэнтам, прэм'ер-міністрам і міністрам абароны ААЭ, правіцелем эмірата Дубай шэйхам Мухамедам бен Рашыдам аль-Мактумам.
