Фота: John Locher / AP / Scanpix / LETA

Узрост: 70 гадоў

Багацце: Больш за тры мільярды даляраў па версіі Forbes і Bloomberg, каля дзевяці мільярдаў — па версіі самога Трампа. Асноўны бізнэс — будаўніцтва, але яго The Trump Organization займаецца практычна ўсім — ад правядзення конкурсаў прыгажосці і да настольных гульняў. Аснову бізнэс-імперыі Трампа заклала яго бабуля Элізабэт і бацька Фрэд.

Палітычная кар'ера: Ніколі не займаў ніякіх дзяржаўных пасадаў і не ўдзельнічаў у выбарах, хоць з яшчэ 1980-х стала заяўляў аб жаданні стаць то прэзідэнтам, то губернатарам Нью-Ёрка. За гэтыя дзесяцігоддзі Трамп тройчы мяняў партыйную прыналежнасць: перш ён быў прыхільнікам Рэспубліканскай партыі, затым падтрымліваў Партыю рэформаў, з 2001 па 2008 год быў дэмакратам, а затым вярнуўся да рэспубліканцаў. У 2011 годзе Трамп на пяць месяцаў абвясціў сябе беспартыйным, але затым зноў уступіў у Рэспубліканскую партыю.

Шлях да намінацыі: Фаварытам рэспубліканскіх праймерыз лічыўся хто заўгодна, але не Трамп: яшчэ да пачатку перадвыбарнай гонкі існавала меркаванне, што за крэсла ў Авальным кабінеце будуць спаборнічаць Хілары Клінтан і Джэб Буш. Вылучэнне Трампа ніхто інакш як жарт не ўспрымаў. Аднак папулісцкая рыторыка Трампа і яго рэзкія, скандальныя выказванні аб іміграцыі, стомленасць выбаршчыкаў ад традыцыйных палітыкаў і шматлікія памылкі канкурэнтаў далі свой плён: спачатку ад удзелу ў прэзідэнцкай гонцы адмовіўся Джэб Буш, а затым сышлі Марка Рубіа, Тэд Круз і Джон Кейсік. Нікому з іх не ўдалося навязаць сур'ёзнай барацьбы Трампу на праймерыз.

Галоўныя пункты праграмы: Пабудаваць сцяну на мяжы з Мексікай, перастаць дамагацца змены рэжымаў за мяжой, перамагчы ІД гэтак жа, як ЗША выйгралі халодную вайну, павялічыць працягласць дэкрэта для маці, стварыць 25 мільёнаў працоўных месцаў, абараніць права на валоданне зброяй.

Погляды на іміграцыю: Трамп не раз абяцаў пабудаваць сцяну на мяжы з Мексікай, прычым за кошт Мексікі, казаў пра небяспеку мігрантаў-мусульман і сцвярджаў, што працоўныя месцы ў першую чаргу павінны даставацца амерыканцам, а не прыезджым. Мільярдэр абяцае максімальна ўзмацніць жорсткасць памежнага кантролю, пазбавіць мігрантаў доступу да сацыяльнага забеспячэння і адмяніць усе законы Барака Абамы, якія паслабляюць адказнасць для нелегальных мігрантаў.

Галоўны правал кампаніі: Абвінавачванні ў сэксуальных дамаганнях пасля таго, як Трамп на дэбатах заявіў, што ніколі не заляцаўся да жанчын і не цалаваў іх без згоды, а таксама публікацыя плёнкі з абразамі на адрас жанчын 11-гадовай даўніны. Пасля гэтых падзей ад Трамп пачалі масава адварочвацца спонсары і ўплывовыя рэспубліканцы. Усе астатнія ўдары, у тым ліку абвінавачванні ў некампетэнтнасці і сыходзе ад падаткаў, Трамп пераносіў практычна бязбольна.

За што любяць: За просталінейнасць, непадобнасць на традыцыйных палітыкаў, за крайнюю кансерватыўнасць і жаданне вярнуць Амерыцы веліч. Трамп кажа тое, што многія думаюць, але не адважваюцца сказаць. Лічыцца, што ён адлюстроўвае інтарэсы той часткі насельніцтва ЗША, да якой іншыя палітыкі наогул не звяртаюцца.

За што крытыкуюць: На думку праціўнікаў Трампа, у мільярдэра няма дастатковай кваліфікацыі і досведу для таго, каб кіраваць краінай; ён занадта запальчывы, каб быць галоўнакамандуючым і распараджацца ядзерным арсеналам ЗША. Погляды Трампа называюць адкрыта расісцкімі (ён сапраўды папулярны сярод амерыканскіх ультраправых), а прапановы адгарадзіцца ад мігрантаў — небяспечнымі для краіны.

Адносіны з Расіяй: Трамп не раз казаў, што паладзіў б з Уладзімірам Пуціным, але падкрэсліваў, што не знаёмы з расійскім прэзідэнтам і не ведае, як пойдуць справы. Ён выступае за паляпшэнне адносін з Расіяй і крытыкуе адміністрацыю Абамы за няўменне дамаўляцца з Пуціным, але ў цэлым ні ў яго публічных выступах, ні ў перадвыбарнай праграме ніякай асаблівай ролі адносінам з Масквой не адводзіцца.

Клас
Панылы сорам
Ха-ха
Ого
Сумна
Абуральна

Хочаш падзяліцца важнай інфармацыяй ананімна і канфідэнцыйна?

Каб пакінуць каментар, калі ласка, актывуйце JavaScript у наладах свайго браўзеру