Паводле яго слоў, згодна з афіцыйнай статыстыкай, легальна ў Польшчы працуе 611 тыс. украінцаў, 9 тыс. малдаван, 7 тыс. 900 беларусаў. «На аснове гэтых звестак мы бачым, што попыт на работнікаў з іншых краін дастаткова расце на фоне зніжэння беспрацоўя ў Польшчы», — адзначыў пасол.
«Мы гатовыя прымаць на кароткачасовы перыяд (ад аднаго да шасці месяцаў) не толькі ў сельскую гаспадарку, але і ў іншыя сектары эканомікі грамадзян іншых краін, у тым ліку Беларусі. Як вы бачыце, колькасць работнікаў з Беларусі ў параўнанні з Украінай невялікая», — адзначыў кіраўнік дыпмісіі.
Паводле слоў Паўліка, кожны дзень у польскае пасольства ў Мінску паступаюць запыты ад працадаўцаў, прадстаўнікоў розных кампаній наконт работнікаў з Беларусі для кароткачасовай працы ў Польшчы ў сферы вытворчасці, сельскай гаспадаркі і паслуг.
«Цяпер важна стварыць канкрэтную структуру, куды маглі б такія заяўкі паступаць. Польскія кампаніі шукаюць пасярэднікаў, якія маглі б аб'яўляць і шукаць беларускіх работнікаў. Ёсць польскія кампаніі, зацікаўленыя стаць такімі пасярэднікамі. Мы высвятляем, якая працэдура атэстацыі і сертыфікацыі для гэтага патрабуецца ў Беларусі», — паведаміў пасол.
Ён зазначыў, што гэта толькі пачатак шляху «сістэмнага вызначэння рамак для пошуку працы ў Польшчы».
«Але мы бачым, што ёсць вялікі попыт у Польшчы, у тым ліку на працаўнікоў з Беларусі. Калі будзе такая ж зацікаўленасць і з беларускага боку, каб арганізаваць усё гэта сістэмна, мы гатовыя да супрацоўніцтва. Пакуль гэта ажыццяўляецца ў абмежаваным рэжыме, пра гэта кажа і статыстыка», — лічыць пасол.
Як зазначыў прэзідэнт Агенцтва аграрнага рынку Польшчы Лукаш Халубоўскі, сельская гаспадарка гэтай краіны — гэта яшчэ і рынак працы. Паводле яго слоў, сёння ў Мінску прайшлі перамовы аб адкрыцці польскага рынку працы сезонных работ для беларусаў.
«Мы гатовыя прымаць працоўныя рукі з Беларусі. Гатовыя гарантаваць умовы працы, сацыяльны пакет і дастойны заробак», — заявіў Халубоўскі.
На яго думку, такая магчымасць працы беларусаў з польскімі прадпрымальнікамі станоўча адаб'ецца і на інвестыцыях, таму што «гэта будзе не толькі знаёмства паміж людзьмі, але і знаёмства з новымі тэхналогіямі, што палегчыць іх перанос у Беларусь».
«Я думаю, што такое добрасуседства апынецца ўзаемавыгадным для абодвух бакоў, таму што яго пладамі будуць якасныя прадукты і інвестыцыі», — лічыць прэзідэнт агенцтва.
