На жаль, беларускія чыноўнікі вышэйшага рангу ўсё яшчэ «на вы» з сацыяльнымі сеткамі. Міністры і дэпутаты краін Захаду цудоўна разумеюць, каб мець папулярнасць і кантакт з людзьмі прысутнасць у сацыяльных сетках проста неабходная. Таму яны актыўна вядуць твітары, фэйсбукі і снэпчаты. Сярэднестатыстычны беларускі чыноўнік максімум мае старонку ў «Аднакласніках» з парай дзясяткаў сяброў.
Аднак з’яўляюцца і тыя, хто лічыць, што быць у сацсетках іх абавязак. Намеснік міністра спорту і турызму Міхаіл Партной нямала часу праводзіць у фэйсбуку, памочнік прэзідэнта па пытаннях спорту Максім Рыжанкоў піша ў твітар, у старшыні Гродзенскага райвыканкама Мечыслава Гоя ёсць старонка Укантакце.
Сярод астатніх варта асабліва адзначыць міністра антыманапольнага рэгулявання і гандлю Уладзіміра Калтовіча. Асабліва радуе, што гэты чыноўнік піша ў сацсетках не толькі працоўныя моманты, але і дзеліцца асабістымі назіраннямі.
Уладзімір Калтовіч у працоўным кабінеце. Фота facebook.com.
Зусім нядаўна Калтовіч выклаў сэлфі з працоўнага кабінета. «Нядзеля, на працы», — падпісаў здымак міністр. На фота ён у нефармальнай абстаноўцы, без гальштука і ў модных акулярах.
Прычым гэта не першае сэлфі ад спадара Калтовіча, неяк ён ужо змяшчаў здымак з роднага Чэрвеня. Змяшчаў таксама фота з вяселля дачкі.
Уладзімір Калтовіч у Чэрвені. Фота з facebook.com.
Вяселле дачкі Уладзіміра Калтовіча. Фота з facebook.com.
Уладзімір Калтовіч нарадзіўся 1 кастрычніка 1966 у Чэрвені. Скончыў БДЭУ (1992) і Акадэмію кіравання пры прэзідэнце (2001). Ён працаваў намеснікам генеральнага дырэктара ў буйных мінскіх крамах: універмагу «Беларусь» і гандлёвым доме «На Нямізе». Быў намеснікам кіраўніка Заводскага раёна Мінска. Узначальваў мінскую гарадскую федэрацыю гандбола. Да прызначэння ў міністэрства Калтовіч працаваў дарадцам-пасланнікам у пасольстве Беларусі ў Маскве.
Уладзімір Калтовіч сваёй актыўнасцю ў фэйсбуку дае цудоўны прыклад іншым міністрам.
