Паўночнаатлантычны альянс пакуль не атрымліваў запрашэння назіральнікаў на расійска-беларускія вучэнні «Захад-2017», але вітае заяву прэзідэнта Беларусі Аляксандра Лукашэнкі аб намеры забяспечыць максімальную празрыстасць гэтых манеўраў. Пра гэта паведамілі сёння ў прэс-службе НАТА.
«Мы пакуль не атрымлівалі запрашэнняў на гэтыя манеўры, аднак, як раней заявіў генеральны сакратар НАТА Енс Столтэнберг, альянс будзе вітаць такую магчымасць і разлічвае на выкарыстанне каналаў Савета Расія — НАТА для правядзення брыфінгу аб гэтых манеўрах», — адзначылі ў прэс-службе альянсу.
Аляксандр Лукашэнка заявіў 20 сакавіка падчас разгляду дакладу аб арганізацыі ў верасні сумесных стратэгічных вучэнняў узброеных сіл Беларусі і Расіі «Захад-2017», што гэтыя манеўры будуць насіць выключна абарончы характар, і за імі змогуць назіраць прадстаўнікі НАТА, піша БелТА.
