Прэзідэнт Узбекістана Шаўкат Мірзіееў заявіў пра пераход дзяржслужачых на 24-гадзінны працоўны дзень і стварэнне спецыяльных аддзелаў для кантролю за іх дзейнасцю, паведамляе інфармагенцтва «Фергана».
Як адзначыў кіраўнік Узбекістана, на працягу двух бліжэйшых гадоў чыноўнікі будуць працаваць круглымі суткамі, і без яго дазволу ніхто не асмеліцца сысці з працы дадому. Мірзіееў таксама паведаміў, што для кантролю за іх працай у рэгіянальных органах улады будуць створаныя «спецыяльныя аддзелы».
«Як было раней — цяпер так не будзе. Альбо вы нарэшце станеце працаваць, альбо вызваліце сваё месца», — заявіў узбекскі лідар. Па яго словах, кіраўнікі «загразлі ў брудзе і карупцыі». Прэзідэнт Узбекістана дадаў, што чыноўнікі застаюцца на сваіх месцах толькі таму, што ў рэспубліцы назіраецца дэфіцыт кадраў. «Гэта наша галоўная бяда. Але праз два гады мы падрыхтуем кадры. Прыйдуць новыя, маладыя людзі», — паабяцаў Мірзіееў.
