У Беларусі спросцяць працэдуру атэстацыі педагагічных кадраў. Гэта прадугледжана пастановай Міністэрства адукацыі, якое падпісаў сёння ў Оршы на пасяджэнні калегіі ведамства яго кіраўнік Ігар Карпенка, паведамляе БЕЛТА.

На калегіі абмяркоўваліся змены і дапаўненні ў інструкцыю аб парадку правядзення атэстацыі педагагічных работнікаў сістэмы адукацыі (акрамя педагагічных работнікаў з ліку прафесарска-выкладчыцкага складу). Папраўкі накіраваныя на спрашчэнне гэтай працэдуры.

Так, адмененая абавязковая атэстацыя на пацвярджэнне вышэйшай кваліфікацыйнай катэгорыі, а таксама кваліфікацыйнай катэгорыі «настаўнік-метадыст». Выключэнне зрабілі для выпадкаў, калі работнік знізіў узровень сваёй працы ці ў яго быў больш чым двухгадовы перапынак у працы на педагагічных пасадах.

Скарацілася колькасць кваліфікацыйных камісій, якія прымаюць экзамен пры праходжанні атэстацыі. Абласныя і Мінскі гарадскі інстытут развіцця адукацыі атрымалі права прымаць экзамен пры наданні вышэйшай кваліфікацыйнай катэгорыі.

Педработнікі з дыпломам магістра або даследчыка цяпер могуць атрымаць другую кваліфікацыйную катэгорыю без уліку стажу працы на пасадзе. Акрамя таго, больш не абмяжоўваецца тэрмін падачы заяў аб прысваенні кваліфікацыйнай катэгорыі.

На калегіі Мінадукацыі абмяркоўваліся сёння асноўныя кірункі ўдасканалення адукацыйнай сістэмы, у тым ліку перагляд навучальных праграм і зместу падручнікаў, укараненне новых падыходаў пры фарміраванні замовы на падрыхтоўку кадраў. Разглядаліся таксама перспектывы сістэмы адукацыі Аршанскага раёна, у якую ўваходзяць 116 устаноў, больш за 3,5 тыс. педагагічных работнікаў. Адзначалася, што для яе развіцця ёсць істотныя рэзервы. Так, трэба будзе значна ўмацаваць матэрыяльную базу, павысіць эфектыўнасць працы кадраў. У выніку гэта павінна дазволіць выйсці на больш высокі якасны ўзровень навучання і выхавання навучэнцаў.

Клас
Панылы сорам
Ха-ха
Ого
Сумна
Абуральна
Каб пакінуць каментар, калі ласка, актывуйце JavaScript у наладах свайго браўзеру