Дзейны кіраўнік Ірана Хасан Рухані перамагае на прэзідэнцкіх выбарах з 59% галасоў. Яўка склала 70%. Гэта паспрыяла пераканаўчай перамозе Рухані.
За яго галасавала моладзь, жыхары гарадоў, інтэлігенцыя і агулам тыя, хто выступае за адкрыццё краіны і супрацоўніцтва з Захадам.
Галоўным канкурэнтам Рухані быў Эбрагім Раісі — кандыдат ад кансерватыўных колаў, блізкі да аяталы Хамэнэі і Корпуса вартавых ісламскай рэвалюцыі. Раісі пасля Ісламскай рэвалюцыі ў 1980-я быў суддзёй і прысудзіў да смерці сотні палітвязняў. Раісі набраў толькі 40% галасоў.
Хоць эканамічная сітуацыя ў краіне не ідэальная, выбарцы выразна прагаласавалі за большую адкрытасць краіны.
Рухані за папярэдні тэрмін удалося дамагчыся адмены санкцый супраць Ірана.
Рухані 68 гадоў. На працягу 20 гадоў ён працаваў у парламенце краіны і займаў розныя пасады ў дзяржаўных структурах.
Іран — краіна ісламская, шыіцкая, у адрозненне ад суніцкай Саудаўскай Аравіі, адносіны з якой у Ірана моцна варожыя, у тым ліку на глебе даўняй рэлігійнай варажнечы.
Прэзідэнт у Іране не мае абсалютнай улады, бо ягоныя рашэнні можа адмяняць рэлігійны лідар — рахбар. Гэтую пасаду ад 1989 года займае аятала Хамэнэі.
Іран — краіна з гіганцкімі запасамі нафты й газу.
Палітычны лад краіны — адзіны такі ў свеце. Гэта тэакратыя, дзе іслам з'яўляецца асновай палітычнай сістэмы, а святары маюць вызначальны голас у палітыцы.
