Тэлевядучы Вячаслаў Бандарэнка — адзін з твараў тэлеканала АНТ. Ён разам з Вадзімам Гігіным робіць перадачу «Справа прынцыпу», а ў вольны час піша кнігі пра дзеячаў расійскай культуры.
Летась Бандарэнка меў неасцярожнасць параўнаць з памагатымі фашыстаў тых беларусаў, якія выступалі супраць помніка Неўскаму ў Віцебску.
Гэтым разам прозвішча тэлевядучага з'явілася на адным прарасійскім сайце, які, імаверна, робіць Кірыл Авер'янаў-Мінскі, якому забаронены ўезд у Беларусь.
Кантэнт таго сайта строга прапагандысцкі. Як прыклад, у адным з матэрыялаў сцвярджаецца, што жаданне крычаць «Жыве Беларусь» пад бела-чырвона-белым сцягам выдае «схільнасць чалавека да педэрастыі».
Дадайце сюды псеўдагістарычныя артыкулы — прыкладна ў духу заблакаванага ў Беларусі «Спутніка і погрома».
Дык што ж на гэты сайт піша Бандарэнка?
Ён задаецца пытаннем, чаму «Малако» большае за «Молоко».
Вось вытрымка:
«Аб'явы прыпынкаў у транспарце, вулічныя шыльды ў Мінску, назвы населеных пунктаў на дарожных знаках у краіне робяцца толькі на беларускай. Некаторыя указальнікі да турыстычных аб'ектаў выконваюцца на беларускай і англійскай. Калі ж руская і выкарыстоўваецца, то назва вуліцы/аб'екта набіраецца буйнымі беларускімі літарамі і тут жа — дробнымі рускімі і ангельскімі. Гэтак жа аформленыя паліцы ў некаторых супермаркетах: буйное «Малако» і побач дробна «Молоко/Мilk». А гэта ж, калі ўдумацца, дыскрымінацыя. Калі ў краіне дзве раўнапраўныя дзяржаўныя мовы, то чаму буйна набрана назва толькі на адной? Пэўна, тым самым руская мова фактычна прыраўніваецца да замежнай. І чаму прыпынку ў транспарце гучаць толькі па-беларуску?.. Можна спаслацца на тое, што ўсе носьбіты рускай мовы ў Беларусі выдатна разумеюць беларускую, і гэта сапраўды так. Але калі прытрымлівацца літары закона, то атрымліваецца, што беларуская мова ставіцца на прыступку вышэй, а гэтага быць не павінна — у нашай краіне абедзве мовы абсалютна роўныя, за абразу рускай мовы можна сапраўды гэтак жа падаваць у суд, як і за абразу беларускай. І я ўпэўнены, што ў выпадку з супермаркетам выбар шрыфта быў абумоўлены зусім не загадам з міністэрства або Адміністрацыі прэзідэнта — не, гэта сімпатыі і антыпатыі кіраўніка крамы», — вядучы дзяржаўнага тэлеканала знаходзіць у Беларусі дыскрымінацыю рускай мовы, і гэта калі на роднай кожны год вучыцца ўсё менш школьнікаў.
Таксама Бандарэнка абурыўся сёлетняй цырымоніяй уручэння прэміі «Тэлевяршыня».
«Цягам цырымоніі вядучыя выкарыстоўвалі мову, прычым падкрэслена. І лаўрэаты на сцэне таксама прымалі правілы гульні — гаварылі па-беларуску. Толькі вядучы Ілля Коласаў — масквіч, які працуе па кантракце, па-руску падзякаваў аўдыторыі. А яго калега, якая ўзяла слова следам, заўважыла, што неўзабаве ў праграме, якую вядзе Коласаў, мовы будзе яшчэ болей. Нібы апраўдваючыся за паводзіны калегі. Выглядала гэта, мякка кажучы, дзіўнавата», — падзяліўся сваім болем Бандарэнка.
Дарэчы, Бандарэнка з'яўляецца сябрам афіцыйнага Саюза пісьменнікаў і мае ўзнагароду ад Лукашэнкі «За духоўнае адраджэнне».
