Гэтую гісторыю кахання Толкін прыдумаў пасля вяртання з акопаў Першай сусветнай
Праз стагоддзе пасля напісання кніга аўтара «Уладара пярсцёнкаў» Джона Рональда Руэла Толкіна пра Берэна і Лютыэн апублікавана і з'явілася на прылаўках кнігарняў.
Гісторыя кахання Берэна і Лютыэн — гэта гісторыя кахання смяротнага мужчыны і несмяротнага эльфа. Выйшаўшы замуж за звычайнага чалавека, Лютыэн адмовілася ад неўміручасці ў імя кахання.
Новую кнігу можна ахарактарызаваць як вельмі асабістую гісторыю, у ёй змяшчаюцца версіі казачнага апавядання, якое з'яўляецца часткай эпічнага «Сільмарыліёна».
Кнігу рэдагаваў 92-гадовы сын пісьменніка Крыстафер Толкін, выданне праілюстраваў Алан Лі, які ў свой час атрымаў прэмію «Оскар» за працу над кінатрылогіяй Пітэра Джэксана «Уладар пярсцёнкаў».
Кніга выйшла ў выдавецтве HarperCollins у дзясятую гадавіну публікацыі апошняй кнігі пра Міжзем'е «Дзеці Хурына».
Літаратуразнаўца, спецыяліст па творчасці Толкіна Джон Гарт мяркуе, што для пісьменніка яго гісторыі былі свайго роду экзарцызмам у выніку тых жахаў, сведкам якіх ён стаў у ходзе Першай сусветнай вайны.
«Калі Толкін вярнуўся з акопаў, з ліхаманкай, зіму 1916-1917 гадоў ён правёў, спрабуючы акрыяць. Ён страціў двух сваіх самых блізкіх сяброў на Соме, і вы можаце сабе ўявіць, як ён быў знясілены, — распавядае Гарт.
А потым у час прагулкі ў лясах Усходняга Ёркшыра Толкін ўбачыў, як яго жонка Эдыт танчыць на паляне, зарослай белымі кветкамі — гэта стала ключавой сцэнай гісторыі пра Берэна і Лютыэн.
«Толкін адчуў тады такую радасць і захапленне, якіх, магчыма, не адчуваў больш ніколі», — кажа Гарт.
Алан Лі таксама працаваў над фільмамі трылогіі «Уладар пярсцёнкаў»
Для новай кнігі Крыстафер Толкін узяў арыгінальную гісторыю бацькі, захаваўшы стыль і форму падання, які стаў у свой час часткай «Сільмарыліёна».
Імёны Берэн і Лютыэн высечаныя на надмагільным камені Джона Раналда Руэла Толкіна і яго жонкі Эдыт на могілках у Оксфардзе.