Грамадзянскі самалёт «Ан-2» з Беларусі парушыў паветраную прастору Літвы, паведаміла ў чацвер Мінабароны Літвы.
Інцыдэнт адбыўся ў сераду. Самалёт знаходзіўся ў паветранай прасторы Літвы ў 14.03-14.07 і ў 14.14-14.17. Парушэнне зафіксавана сродкамі назірання за паветранай прасторай ВПС Літвы і візуальна.
У сувязі з незаконным перасячэннем дзяржаўнай мяжы Служба аховы дзяржмяжы Літвы пачала дасудовае расследаванне.
У сувязі з інцыдэнтам у чацвер будзе ўручана нота часоваму паверанаму ў справах Беларусі ў Літве, сказала BNS прэс-аташэ міністра замежных спраў Раса Якілайцене.
Парушэнне паветранай прасторы Літвы зафіксавана ў гэтым годзе ўпершыню. Пра інцыдэнт быў інфармаваны кантынгент НАТА, які ажыццяўляе місію паветранай паліцыі. Былі спробы ўстанавіць сувязь з самалётам, але ён быў без транспондараў.
У канцы красавіка паветраную прастору Беларусі парушыў грамадзянскі самалёт, што заляцеў з Літвы. Лёгкі самалёт P46T пілатаваў грамадзянін Даніі.
