У фінальнай вэрсіі мабільнай апэрацыйнай сыстэмы iOS 11 мае зьявіцца даступная па змаўчаньні беларуская раскладка клявіятуры.
У папярэдняй вэрсіі iOS 11, даступнай распрацоўнікам, беларуская раскладка ўжо ёсьць. Фінальная мае стаць даступнай карыстальнікам iPhone 5s і навейшых, iPad Air і навейшых увосень 2017 году.
У адной са свежых IOS11 beta з'явілася дэфолтная беларуская клавіятура.
У даступных сёньня вэрсіях iOS няма даступнай па змаўчаньні беларускай раскладкі клявіятуры, а пагатоў беларускамоўнага інтэрфэйсу. Але можна ўсталяваць беларускую клявіятуру ад староньніх распрацоўнікаў — такая магчымасьць зьявілася ў iOS 8, праз 7 год пасьля прэзэнтацыі першага iPhone.
Тым часам беларуская раскладка ёсьць у стандартных клявіятураў на Android і Windows Phone. Ад першай вэрсіі Windows Phone мела беларускую вэрсію інтэрфэйсу. Смартфоны на Android да нядаўняга часу мелі беларускі інтэрфэйс толькі ў асобных вытворцаў, якія самі распрацавалі пераклад, але ад 7-й вэрсіі Android беларускі інтэрфэйс стаў даступным па змаўчаньні.
Беларускія законы, адрозна, напрыклад, ад украінскіх ці казаскіх, не патрабуюць, каб інфармацыя аб прадукцыі, якая пастаўляецца на рынак, была на нацыянальнай мове або на ўсіх дзяржаўных мовах — дастаткова і расейскае. У беларускім заканадаўстве прапаноўвалі замацаваць норму, каб этыкеткі на таварах былі на абедзьвюх дзяржаўных мовах, але адпаведны законапраект прайшоў першае чытаньне ў Палаце прадстаўнікоў без такіх зьменаў — і цалкам верагодна, што закон будзе прыняты без уліку гэтай прапановы.
