Reuters.com
Аўстралійская паліцыя прад'явіла абвінавачанні ў сэксуальных дамаганнях кардыналу Джорджу Пэлу, які ўзначальвае Сакратарыят па справах эканомікі Ватыкана. Абвінавачанні прад'яўленыя ў аўстралійскім штаце Вікторыя, дзе Пэл служыў у 1970-я. Імёны пацярпелых і сутнасць абвінавачванняў не раскрываюцца.
Аўстралійская каталіцкая царква ўжо заявіла, што Пэл катэгарычна абвяргае абвінавачванні і плануе з'явіцца ў суд, каб даць паказанні. Пасяджэнне суда ў Мельбурне прызначана на 18 ліпеня.
Раней Пэла публічна абвінавачвалі ў тым, што ён спрабаваў дамовіцца аб хабары, каб схаваць дамаганні з боку Джэральда Рыдсдэйла — святара, якога з 1993 па 2013 год неаднаразова асудзілі за злачынствы сэксуальнага характару супраць дзяцей. У 2017 годзе Рыдсдэйл прызнаўся яшчэ ў 20 злачынствах.
У 2016 годзе Пэл па відэасувязі з Рыма даў паказанні перад спецыяльна створанай камісіяй па сэксуальных злачынствах супраць дзяцей. Затым аўстралійскія дэтэктывы дапыталі Пэла ў Рыме датычна злачынстваў у Балараце, дзе жыў Рыдсдэйл.
Як адзначае ABC News, у іерархіі Каталіцкай царквы Пэл стаіць трэцім пасля папы рымскага.
