Дзяржаўнае прадпрыемства «Мінсктранс» тэстуе новую сістэму аплаты праезду на прыгарадных маршрутах. Такая інфармацыя з'явілася ў газеце «Транспартнік сталіцы», паведамляе карэспандэнт агенцтва «Мінск-Навіны».
Доследны ўзор, усталяваны ў аўтобусе «МАЗ-103», прапанаваў філіял «Аўтобусны парк № 4».
Зараз, каб аплаціць праезд на прыгарадзе бескантактавай смарт-картай з запісанымі на ёй транспартнымі тарыфнымі адзінкамі (ТТА), пасажырам неабходна прыкладваць карту да валідатара два разы: пры ўваходзе ў транспартны сродак і пры выхадзе з яго. Пры прыкладанні падчас пасадкі са смарт-карты спісваецца колькасць ТТА, адпаведная памеру аплаты праезду да канчатковага прыпынкавага пункта маршруту. Пры паўторным прыкладанні падчас высадкі нявыкарыстаныя ТТА вяртаюцца.
Аднак, як паказала практыка, пры такой сістэме аплаты перыядычна ўзнікаюць пэўныя праблемы.
Напрыклад, некаторыя пасажыры пры выхадзе з салона паміж канчатковымі пунктамі маршруту забываюць паўторна прыкладваць БСК да валідатара і ў выніку звяртаюцца ў «Мінсктранс» з просьбай вярнуць ім спісаныя грошы. Акрамя таго, існуе катэгорыя грамадзян, якая паводзіць сябе, мякка кажучы, некарэктна і прымудраецца на праездзе «эканоміць»: прыкладваюць карту пры пасадцы, на наступным прыпынку прыкладваюць яе паўторна, а самі працягваюць ехаць далей па маршруце бясплатна.
Каб выключыць падобныя сітуацыі, кіраўніцтвам «Мінсктрансу» прынята рашэнне змяніць сістэму аплаты праезду на прыгарадных маршрутах: у найбліжэйшай перспектыве замест двух разоў смарт-карту да валідатара пасажырам трэба будзе прыкладаць толькі адзін.
— Для гэтай мэты ў кабіне кіроўцы будзе ўсталяваны дадатковы валідатар, — тлумачыць намеснік генеральнага дырэктара «Мінсктранса» Іван Жук. — Атрымаўшы інфармацыю ад пасажыра, кіроўца самастойна зможа ўвесці ў сістэму патрэбны чалавеку прыпыначны пункт, пасля чаго на экране валідатары з'явіцца кошт аплаты праезду з пункта А ў пункт Б. Калі пасажыр гатовы аплаціць праезд пластыкавай картай, неабходна прыкласці яе да валідатара: з БСК спішацца толькі патрэбная колькасць транспартных тарыфных адзінак, і, адпаведна, другі раз прыкладаць карту да валідатара ўжо не давядзецца. У цяперашні час упраўленне АСК прадпрыемства сумесна з тэхнічнымі службамі чацвёртага і шостага аўтобуснага паркаў распрацавалі схему ўсталявання дадатковага валідатара ў кабіне. Усё прадумана такім чынам, каб было зручна карыстацца і кіроўцу, і пасажыру.
Варта адзначыць, што перавозка пасажыраў па прыгарадных маршрутах ажыццяўляецца аўтобусамі «МАЗ» розных мадэляў: 103, 107С, 203, 206, 226. І ў кожнай валідатар будзе ўсталяваны па сваёй схеме. Што тычыцца валідатараў, размешчаных у салонах транспартных сродкаў, то папярэдне плануецца адключаць іх ад сілкавання падчас руху па маршрутах. Таксама неабходна звярнуць увагу на тое, што пры новай сістэме аплаты праезду пасажырам прыйдзецца ажыццяўляць пасадку ў транспартны сродак выключна праз пярэднія дзверы. Як і зараз, пры адсутнасці БСК або сродкаў на ёй аплаціць паездку пасажыры змогуць наяўнымі грашыма.
Калі «Мінсктрансу» будзе прадэманстраваны праграмны прадукт, сталічныя транспартнікі правядуць тэставанне сістэмы на адным з прыгарадных маршрутаў прадпрыемства. Пасля чаго тэхналогію ўкарэняць на ўсім рухомым саставе, які працуе на прыгарадзе. Аб усіх зменах пасажыраў праінфармуюць загадзя.
