У Барысаве судзяць прапаршчыка з 72-га вучэбнага цэнтра ў Пячах, паведамляе Tut.by. Гэта справа не звязана са смерцю Коржыча, хоць была заведзеная пасля татальнай праверкі ў частцы. Мужчыну абвінавачваюць у перавышэнні паўнамоцтваў, абразе салдат і атрыманні ад іх хабараў. Суд пачаўся яшчэ ў лютым, але пра працэс стала вядома толькі сёння.
Фота: Вольга Шукайла, Tut.by.
На судовай лаве — 25-гадовы прапаршчык Ігар Хішчанка з 59-й школы, дзе рыхтуюць спецыялістаў па эксплуатацыі і рамонце аўтатэхнікі. На перыяд разгляду яго адхілілі ад службы і ўзялі пад варту.
Мужчыну абвінавачваюць адразу па трох артыкулах Крымінальнага кодэкса. І калі за абразу салдат яму пагражае толькі арышт на некалькі месяцаў, то за перавышэнне паўнамоцтваў або хабар — ад 3 да 10 гадоў пазбаўлення волі.
Пацярпелымі па справе прызнаныя 18 чалавек, якія праходзілі службу ў Пячах ў 2016-м. У асноўным тады яны былі радавымі і падпарадкоўваліся старэйшаму па званні Ігару Хішчанку. Яшчэ амаль два дзясяткі чалавек, калегі, праходзяць сведкамі.
Хлопцы ўжо адслужылі і вярнуліся дадому ў розныя гарады і вобласці Беларусі. Таму цяпер іх дапытваюць па відэасувязі. Некаторыя ў дзеяннях прапаршчыка не бачаць чагосьці «крымінальнага», але прызнаюць: у статуце такое не прапісана.
Па матэрыялах справы, Хішчанка не раз біў салдат спецыяльным скруткам з газет, пераматаным скотчам. Або ўказкай, якая аднойчы зламалася ад удару.
У матэрыялах справы значыцца, што прапаршчык караў падначаленых фізічнымі практыкаваннямі пасля заняткаў. Напрыклад, «фінскі лыжнік» (рукі за галаву і скачкі з аднаго калена на іншае) або «Кока-Джамба» (прысяданне і скачок з гэтага становішча ўверх з выцягнутымі рукамі). Каб ускладніць задачу, салдата прымушалі апранаць бронекамізэльку або процігаз.
Пацярпелы Антон Прыбыткін, 24-гадовы трактарыст з Камянецкага раёна, добра памятае пра выкарыстанне электрошокера абвінавачаным.
Таксама пацярпелы атрымліваў па ягадзіцах скруткам з газет за «напэўна, я перашкодзіў прайсці», а яшчэ указкай. Памятае, як хадзіў з таварышамі ў буфет, за што «трэба было нешта купіць прапаршчыку». Напрыклад, пачак цыгарэт. Іншыя распавялі, як куплялі прапаршчыку піцу ці кока-колу. Усё за свой кошт.
Следчым хлопец таксама казаў, што прапаршчык пастаянна словамі прыніжаў курсантаў: «Не ведаю, з якой прычыны, здавалася, што мы вечна ўсё робім не так».
Адвакат прапаршчыка ўдакладніла ў пацярпелага, ці прыніжаліся такім чынам яго гонар і годнасць? Хлопец кажа, што не.
— А калі тры нарады па-за чаргой, таксама б не закранула? — удакладніў суддзя.
— Не.
— Так што для вас лепей: пайсці ў нарад ці?..
— Калі шчыра, мне ў нарадзе не падабалася, лепш атрымаць па ягадзіцах, — смеючыся, заявіў малады чалавек.
— Гэта значыць, у царскай арміі вы б прыжыліся …
На пытанне суда, якое пакаранне варта прызначыць прапаршчыку, абодва адказалі: строга не трэба.
У адрозненне ад іншых дапытаных, 25-гадовы сведка Уладзіслаў Абухоўскі адразу заявіў: у яго стаўленне да фігуранта зусім не «нармальнае».
— У яго заўсёды была непрыязнасць да салдатаў. Увечары «раздаваў»: каму скруткам па галаве, каму па плячах. Дзеля забавы, напэўна, — распавядае былы радавы, а цяпер працаўнік вагоннага дэпо. Паводле яго слоў, салдаты пры гэтым нічога не парушалі.
А вось за парушэнні прапаршчык караў рамянём, біў нават у машонку.
Ці прызнае сам прапаршчык віну, пакуль невядома. Яго яшчэ не дапытвалі ў судзе. Хоць адзін з пацярпелых згадаў: падчас іх вочнай стаўкі Хішчанка прасіў прабачэння, «што няправільна рабіў».
Вайскоўцу прад'яўленае абвінавачванне па ч.1,2 арт. 430 (Атрыманне хабару, паўторна), арт. 444 (Абраза начальнікам падначаленага ў сувязі з выкананнем абавязкаў вайсковай службы), ч.1 арт. 455 (Злоўжыванне ўладай або службовымі паўнамоцтвамі), ч.2 арт. 455 (Перавышэнне паўнамоцтвамі, спалучанае з гвалтам), а таксама па ч.1 арт. 14 і ч.2 арт. 455 (Замах на перавышэнне ўлады або паўнамоцтваў).
