20 сакавіка падчас сустрэчы кіраўніка Беларусі з творчай моладдзю запыталіся, калі Лукашэнка нарэшце прыдзе ў сацыяльныя сеткі. У прыватнасці гаворка вялася пра Instagram.
Прэзідэнт сказаў, што прэс-сакратарка Наталля Эйсмант даўно ўгаворвае яго прыйсці ў сацыяльныя сеткі. «Марай жыве, каб у мяне дзесьці была старонка».
«Але ж там будзе нават не тысяча паведамленняў. Вы ж усе будзеце пісаць з мэтай паразмаўляць з прэзідэнтам», — сказаў Лукашэнка. Кіраўнік Беларусі адзначыў, што адказаць усім асабіста не зможа, а наймаць памочніка, каб адказваў той, лічыць нячэсным.
«Пакуль устрымаюся. Сайт прэзідэнта ёсць, чаму вы туды не пішаце?» — сказаў беларускі лідар.
У сваю чаргу Наталля Эйсмант запэўніла, што бліжэйшым часам, магчыма, будзе створаная старонка ў інстаграме прэс-службы прэзідэнта, дзе можна будзе дзяліцца нефармальнымі здымкамі, якія не трапляюць на афіцыйны сайт.
