Інстытут гісторыі НАН Беларусі, Цэнтральная навуковая бібліятэка імя Якуба Коласа НАН Беларусі і магазін «Акадэмічная кніга» запрашаюць на прэзентацыю навуковай манаграфіі «Грамадска-палітычнае жыццё ў Беларусі 1772—1917 гг.».

Кніга, якая , якая выйшла ў выдавецтве «Беларуская навука», з’яўляецца вынікам працы цэлага аўтарскага калектыва. У яго склад увайшлі даследчыкі Інстытута гісторыі, Педагагічнага ўніверсітэта, Рэспубліканскага інстытута вышэйшай школы, Акадэміі кіравання пры Прэзідэнце.

Гэта выданне адметна тым, што гістарычныя працэсы паказаны як на макра-, так і на мікраўзроўнях. Дзякуючы шырокаму колу крыніц, новым ракурсам і падыходам, гэта кніга падае не толькі аб’ёмную гістарычную панараму, але ўводзіць чытача ў супярэчлівы, напружаны, таямнічы свет ХІХ стагоддзя.

Да мерапрыемства прымеркавана выстава кніг з фондаў Цэнтральнай навуковай бібліятэкі імя Якуба Коласа НАН Беларусі. На ёй прадстаўлена ранняя гістарыяграфія XIX і пачатку ХХ стагоддзяў, у прыватнасці, работы, прысвечаныя вайне 1812 года, паўстанням 1830—1831 і 1863—1864 гадоў.

Экспануюцца кнігі ўспамінаў дзяржаўных дзеячаў і чыноўнікаў, якія вызначалі грамадска-палітычнае жыццё на беларускіх землях, арыгіналы эпісталярных і мемуарных крыніц — лісты, дзённікі, успаміны грамадскіх дзеячаў, удзельнікаў паўстанняў. Выстаўлены прыклады перыядычнага друку ХІХ — пачатку ХХ стагоддзяў, першыя выданні заканадаўчых актаў, а таксама літаратурныя творы ХІХ стагоддзя, якія паслужылі гістарычнымі крыніцамі для аўтараў манаграфіі.

На выставе будуць прадстаўлены не толькі арыгіналы крыніц ды ўзоры ранняй гістарыяграфіі грамадска-палітычнага руку канца XVIII — пачатку ХХ стагоддзяў, але і асноўныя дасягненні сучаснай гістарыяграфіі ў гэтай сферы.

Прэзентацыя выдання пройдзе ў інфармацыйна-выставачным цэнтры ЦНБ НАН Беларусі (вул. Сурганава, 15). Выступяць дырэктар ЦНБ Аляксандр Груша, дырэктар Інстытута гісторыі НАН Беларусі Вячаслаў Даніловіч, акадэмік Міхаіл Касцюк, дэкан гістарычнага факультэта БДУ Аляксандр Каханоўскі.

Клас
Панылы сорам
Ха-ха
Ого
Сумна
Абуральна
Каб пакінуць каментар, калі ласка, актывуйце JavaScript у наладах свайго браўзеру