У пачатку мая Лукашэнка адхіліў ад работы міністра энэргетыкі Уладзіміра Патупчыка, які прабыў на пасадзе пяць гадоў.
Вядома, што катэдж экс-міністра ля Драздоў арыштаваны, а афіцыйная прычына адхілення — «спрыянне стварэнню незаконнага сямейнага бізнесу».
Чытайце: Стала вядома, за што звольнілі міністра энергетыкі
Можна меркаваць, што цяпер міністр знаходзіцца пад вартай.
Новы паварот гісторыі дае адзін з расійскіх аўтарытэтных тэлеграм-каналаў. Ён прысвяціў артыкул адыёзнай прапуцінскай актывістцы Хрысціне Патупчык, якая вядомая арганізацыяй цкавання некаторых расійскіх апазіцыйных дзеячаў і СМІ.
Крыніцы тэлеграм-канала паведамляюць, што беларускі экс-міністр прыходзіцца Хрысціне Патупчык стрыечным дзядзькам.
«Па некаторых падліках, з 2013 года ён зарабіў $40 мільёнаў на арганізацыі паставак вугалю з ЛДНР у Еўрасаюз праз падстаўныя польскія юрыдычныя асобы. А ў Данбас ён адгружаў салярку і бензін», — паведамляюць крыніцы.
Але, маўляў, пасля інфармацыі аб меркаванай адстаўцы Суркова (памочніка Пуціна, які курыруе непрызнаныя рэспублікі), пэўныя расійскія сілы на чале з віцэ-прэм'ерам Дзмітрыем Казаком вырашылі адхіліць Патупчыкаў ад хлебнага бізнесу.
Таксама паведамляецца, што жонка Патупчыка жыве асобна ў Калінінградзе. Называецца і імя яго маладой каханкі, якая, у сваю чаргу, нібыта цяпер стала знаходзіцца ў Вене.
«Нашай Ніве» не ўдалося ні пацвердзіць, ні абвергнуць гэтыя чуткі.