Жудасную знаходку зрабіла жыхарка Гродзенскай вобласці, калі адкрыла пачак з курынымі субпрадуктамі. Там яна знайшла чалавечы палец, а міліцыя ўжо адшукала яго меркаванага ўладальніка, перадае TUT.BY.
Жанчына купіла набор курыных шыек, а 21 чэрвеня дастала іх з маразілкі і пакінула на кухні, каб прыгатаваць пазней. І неўзабаве жахнулася, калі ўнутры разгледзела нешта падобнае да чалавечага пальца. Мясцовыя жыхары апублікавалі ў сацсетках здымак.
Фота: даслана чытачом
Пакупніца адразу выклікала міліцыю, і супрацоўнікі адшукалі мужчыну з падобнай траўмай. Паводле інфармацыі TUT.BY, ім аказаўся супрацоўнік птушкафабрыкі ў Мінскай вобласці, дзе ў канцы траўня і быў выпушчаны той пачак субпрадуктаў.
Ва УУС Мінаблвыканкама пацвердзілі, што міліцыя разбіраецца ў абставінах гэтага выпадку.
«Ад жыхаркі Гродзенскай вобласці паступіла паведамленне аб выяўленні ў пакунку з мясной прадукцыяй фалангі пальца. Прадукцыя выраблена на адным з прадпрыемстваў Мінскай вобласці. Праводзіцца праверка. Не выключаецца, што інцыдэнт меў месца ў выніку здарэння на вытворчасці», — паведамілі TUT.BY у абласным упраўленні ўнутраных спраў.
Мясцовыя жыхары абураныя і задаюцца пытаннем: якія меры прыме само прадпрыемства і службы кантролю. Паводле неафіцыйных звестак, у пацярпелага работніка фабрыкі адсутнічалі фалангі на некалькіх пальцах.
