Міністр унутраных спраў Брытаніі Саджыд Джавід заклікаў расійскія ўлады растлумачыць, якім чынам два жыхары Брытаніі, знаходзячыся ў графстве Уілтшыр, атруціліся нервова-паралітычным рэчывам «Навічок».
Як раней стала вядома, у мінулую суботу, 30 чэрвеня, былі шпіталізаваны 45-гадовы Чарлі Роўлі і 44-гадовая Дон Стэрджэс з прыкметамі атручэння, падобнымі на тыя, якія былі выяўлены сёлета ў сакавіку ў былога двайнога агента Сяргея Скрыпаля і яго дачкі.
Роўлі і Стэрджэс, якія знаходзяцца ў крытычным стане, пражываюць у горадзе Эймсберы, за 11 кіламетраў ад горада Солсберы, дзе былі знойдзены без прытомнасці Скрыпалі.
Джавід заявіў, што нервова-паралітычнае рэчыва, якім атруцілася пара ў Эймсберы, такой самай групы, што і субстанцыя, якой атруцілі ў сакавіку Сяргея і Юлію Скрыпаль.
