У Веткаўскім раёне 46-гадовы жыхар Гомеля патануў, ратуючы сына, паведаміў карэспандэнту БелТА вядучы спецыяліст Гомельскай абласной арганізацыі АСВОД Сяргей Касцючэнка.
Трагедыя адбылася 29 ліпеня прыкладна апоўдні на рацэ Сож паблізу вёскі Хальч. Некалькі сем'яў адпачывалі на беразе. У нейкі момант 9-гадовы хлопчык, які хадзіў па мелі, ступіў у глыбокае месца і пачаў тануць. На дапамогу яму кінуўся бацька. Мужчына змог выштурхнуць дзіця, аднак сам патануў.
У гэты дзень трагедыя на вадзе адбылася і ў абласным цэнтры. Папярэдне высветлена, што 58-гадовы мужчына лавіў рыбу раніцай на вадаёме па праспекце Касманаўтаў і ў нейкі момант вырашыў выкупацца. Трохі праплыўшы, ён пайшоў пад ваду. Яму спрабаваў дапамагчы мінак, аднак безвынікова. Ратавальнікі, якія прыбылі да месца здарэння, паднялі рыбака з вады, аднак рэанімаваць яго не ўдалося.
Таксама днём раней няшчасны выпадак на вадзе, у выніку якога загінуў 37-гадовы мужчына, адбыўся ва ўрочышчы Шубіна Веткаўскага раёна. Усяго ў Гомельскай вобласці з пачатку года патанулі 29 чалавек.
