Мужчына, якому было каля 30 гадоў, адпачываў у кампаніі. Яго паспелі выцягнуць з вады, але не выратавалі.
Маладзечанец Аляксандр, што апынуўся на тым вадаёме, расказаў, што ніхто не ведаў, што рабіць.
«Мы з сябрамі адпачывалі з іншага берага возера, і ўжо з’язджалі дадому, калі раптам нам насустрач выбегла жанчына, якая звала на дапамогу. З яе словаў мы зразумелі, што ў вадзе тоне мужчына. Пакуль мы дабеглі да таго месца, у ваду кінуўся таксіст, які апынуўся побач. Ён выцягнуў мужчыну на бераг і адышоўся ў бок, аддыхацца».
Алякандр кажа, што ў гэты момант ва ўсіх прысутных было толькі адно пытанне: «А што цяпер?»
«Жанчына галасіла, мае сябры таксама стаялі і разводзілі рукамі. Я падумаў: ну блін, ва ўсіх жа ў школе былі ўрокі АБЖ, і пачаў рабіць тое, пра што пісалі ў падручніках.
Я не ўмею рабіць ні масаж сэрца, ні штучнае дыханне, але нахіліўся над ім і спрабаваў штосьці рабіць.
Ніціскаў і націскаў на грудзіну, пакуль не пачуў, што нешта хруснула. Я зламаў яму рабрыну. Рабіў штучнае дыханне, пакуль не пачуў, што пад’ехала «хуткая». Мае вусны да гэтага баляць ад яго зубоў. На апошнім уздыху з носа мужчына пайшла кроў. Я падумаў, а раптам так павінна быць, і ён ачуняе.
Але доктар, што прамацаў пульс, сказаў толькі адно слова: «Смерць».
Што ж рабіць у такой надзвычайнай сітуацыі?
Дыспетчар службы 101 расказаў, якім павінен быць алгарытм дзеянняў, пакуль на месца здарэння не прыедзе «хуткая» дапамога:
«Па-першае, кідацца ў ваду, каб выратаваць кагосьці, можна, толькі калі вы ўпэўненыя ва ўласных сілах. Таму што чалавек, які тоне, знаходзіцца ў стане шоку, ён будзе чапляцца вам за шыю, каб выратавацца самаму. Таму, калі вы падплылі да чалавека, старайцеся схапіць яго ззаду».
Што рабіць, калі вы выцягнулі чалавека на бераг, а ён без прытомнасці?
- Пакладзіце яго на спіну, пад шыю падкладзіце што-небудзь, каб зафіксаваць галаву.
- Зацісніце чалавеку нос і ўдыхніце ў рот паветра тры разы. Пасля дзесяць разоў націскайце на грудную клетку.
- Моцна ціснуць не трэба, інакш можаце зламаць чалавеку рабрыну.
«Рэанімацыйныя дзеянні, — кажа дыспетчар МНС, — у ідэале трэба праводзіць удваіх. Адзін чалавек робіць два ўдыхі, другі — пяць разоў націскае на грудзі».
Калі чалавек прыйшоў у сябе і пачаў адкашліваць ваду, павярніце яго на бок, каб ён не захлынуўся.
«І адразу аддайце ў рукі хуткай дапамогі», — падсумаваў дыспетчар.