Уначы 22 ліпеня з крамы адзення на праспекце Незалежнасці былі скрадзеныя $10 тысяч, прызначаныя для набыцця новага абсталявання. Зламыснік трапіў у памяшканне, узламаўшы дзвярныя замкі, паведамляе МУС.
Следчыя высветлілі, што ў суседняй краме бытавой хіміі замкі таксама былі зламаныя. У памяшканні быў беспарадак, зніклі прылады для галення.
Абедзве гандлёвыя кропкі не былі абсталяваны сігналізацыяй, відэакамеры былі ўсталяваныя толькі ў краме бытавой хіміі.
Супрацоўнікамі аддзела крымінальнага вышуку Першамайскага РУУС г.Мінска быў вызначаны падазраваны ў крадзяжы. Ім аказаўся 45-гадовы мінчанін. Раней мужчына ўжо прыцягваўся да крымінальнай адказнасці за крадзяжы з крамаў.
Цяпер ён адбывае пакаранне ў папраўчай установе адкрытага тыпу, а на момант здзяйснення злачынства знаходзіўся ў кароткатэрміновым трохдзённым адпачынку.
Грошы былі канфіскаваныя ў падазраванага амаль у поўным аб'ёме — ён схаваў іх дома, каб пасля купіць машыну.
Мінчуку пагражае ад двух да сямі гадоў з канфіскацыяй маёмасці або без канфіскацыі.
