Сацсетка «Укантакце» ўвяла новыя налады прыватнасці, анансаваныя раней. Зараз карыстальнік можа цалкам схаваць змест старонкі ад усіх незнаёмцаў і не баяцца, што яго кантэнт убачаць прадстаўнікі праваахоўных органаў.
Для таго, каб змяніць налады прыватнасці, дастаткова перайсці па спасылцы.
Такія змены кампанія называе «рэформай прыватнасці». «Цяпер вы можаце ў адзін момант зрабіць свой профіль цалкам прыватным і абараніць асабістую прастору ад незнаёмцаў, пакінуўшы старонку адкрытай толькі для сяброў», — гаворыцца ў паведамленні.
Цяпер карыстальнікам сацыяльнай сеткі будзе даступна каля двух дзясяткаў розных налад прыватнасці. Пакуль што яны дзейнічаюць толькі для дэсктопнай версіі «Укантакце», аднак неўзабаве налады можна будзе змяніць і ў мабільнай версіі.
У адпаведнасці з новымі правіламі ўвесь даданы на старонку кантэнт (запісы, фатаграфіі, відэа і музыка) будзе хавацца аўтаматычна. Адкрыць яго карыстальнік зможа, змяніўшы адпаведныя пункты ў наладах. Акрамя таго, закрытым стане і спіс карыстальнікаў, якія падзяліліся публікацыяй: убачыць яго зможа толькі аўтар матэрыялу або адміністратары суполкі, якая зрабіла допіс.