Па падазрэнні ў атрыманні хабару затрыманы кіраўнік прадпрыемства «ЖКГ № 1 Фрунзенскага раёна Мінска» Андрэй Арлоўскі. Інфармацыю пацвердзілі ў Следчым камітэце, піша Tut.by.
Дырэктара раённага ЖКГ затрымалі проста на працоўным месцы 31 жніўня. Яго падазраюць у атрыманні буйнога хабару на тысячы долараў.
У прыёмнай прадпрыемства кажуць, што дырэктара на месцы няма і «не будзе», але ўдакладняць прычыну катэгарычна адмаўляюцца. Цяпер абавязкі Арлоўскага выконвае адна з намеснікаў; афіцыйна кіраўнік знаходзіцца ў адпачынку — яго аформілі яшчэ да затрыманьня. Куды прапаў супрацоўнік, не ведаюць толкам і ў «Мінскай гарадской жыллёвай гаспадарцы»: там патлумачылі, што афіцыйных дакументаў пакуль не атрымлівалі.
Гаворка ідзе пра крымінальную справу, пацвердзіла афіцыйны прадстаўнік Следчага камітэта Юлія Ганчарова:
«З Дэпартамента фінансавых расследаванняў КДК паступіла крымінальная справа па ч. 2 арт. 430 Крымінальнага кодэкса (Атрыманне хабару). Яна прынята да далейшай вытворчасці Следчым камітэтам», - удакладніла яна. Іншыя падрабязнасці будуць абвешчаныя пазней.
