У распараджэнні «Нашай Нівы» аказаўся дакумент, які прыйшоў з Міністэрства сельскай гаспадаркі старшыням Мінгарвыканкама і аблвыканкамаў.
У ім патрабуецца «забяспечыць фінансавыя сродкі на помнік карове згодна з загадам кіраўніка краіны».
Гаворка ідзе пра суму 275 тысяч рублёў, што па курсе трохі меней за $130 тысяч.
Аблвыканкамы мусяць сабраць грошы ў вызначаных долях. Па завядзёнцы падобныя загады спускаюцца ніжэй, у тым ліку ў прыватныя фірмы.
Але што ж гэта за помнік?
Гаворка ідзе пра помнік карове, які мае з'явіцца каля Камароўскага рынка ў Мінску. Ён будзе зроблены з бронзы. Скульптар — Мікалай Байрачны.
Абгрунтаванасць сумы «Нашай Ніве» ў Міністэрстве сельскай гаспадаркі патлумачыць не здолелі, сказаўшы, што займаюцца толькі спагнаннем сродкаў.
Чыноўнікі Мінгарвыканкама на запыт «НН» пакуль не адказалі.
