Фота Яўген Ярчак
На Паўднёвым Захадзе, Захадзе і цэнтры Мінска сёння пахне гарам. Аказалася, што цяпер умовы надвор'я спрыяюць назапашванню забруджвальных рэчываў у прыземным слоі атмасфернага паветра.
Як пракаментавалі TUT.BY у аддзеле аналізу экалагічнай інфармацыі Белгідрамета, сказаць адназначна, чаму ў некаторых раёнах Мінска пахне гарам, нельга. Аднак бабіна лета — гэта класічны перыяд, калі адзначаецца павышаны ўзровень забруджвання атмасфернага паветра.
— На працягу доўгага перыяду адсутнічаюць ападкі, назіраецца слабы вецер, штыль, павышаны тэмпературны рэжым, нехарактэрны для гэтага часу года, — метэаўмовы спрыяюць назапашванню забруджвальных рэчываў у прыземным слоі паветра. На падставе дадзеных маніторынгу атмасфернага паветра разлічваецца параметр забруджвання, прымаецца пад увагу прагноз надвор'я на наступныя суткі і прымаецца рашэнне, перадаваць папярэджанне прадпрыемствам ці не. Параметр забруджвання атмасфернага паветра ў Мінску апошнімі днямі вырас у 1,5-2 разы. Павелічэнне канцэнтрацый адзначаецца ў асноўным па аксідзе азоту
Для рэгулявання выкідаў забруджвальных рэчываў буйным прамысловым і аўтатранспартным прадпрыемствам Мінска яшчэ ў чацвер на мінулым тыдні Белгідрамет накіраваў папярэджанні аб неспрыяльных метэаўмовах. На прадпрыемствах распрацаваны пералік мерапрыемстваў, якія трэба выканаць, каб знізіць выкід забруджвальных рэчываў у атмасферу.
Як распавялі ў аддзеле аналізу экалагічнай інфармацыі, з-за паніжэння начных тэмператур сітуацыю можа пагаршаць і тое, што ў прыватным сектары ў прыгарадзе Мінска дамы ацяпляюць цвёрдым палівам.
