Дом Уладзіміра Караткевіча ў Оршы, які быў выстаўлены на продаж летам 2018 года, нарэшце знайшоў новага гаспадара.
Фота: Анжаліка Васілеўская, Tut.by.
Як стала вядома «Нашай Ніве», збудаванне выкупіў уладальнік сеткі крамаў «Пяты элемент» Андрэй Балабін.
Павел Тапузідзіс і Андрэй Балабін (справа). Фота: Вадзім Заміроўскі, Tut.by
Інфармацыю пацвердзіў былы намеснік старшыні Аршанскага райвыканкама па ідэалогіі Алег Смірноўскі, які быў даверанай асобай бізнэсмена падчас ажыццяўлення ўгоды. Пазней гэта спраўдзіў і сам Балабін.
«Лічу, што падтрыманне праектаў у галіне культуры — абавязак кожнага беларускага бізнэсмэна. 2018 год у Беларусі прысвечаны малой радзіме. Орша — горад, дзе я нарадзіўся, тут прайшло маё дзяцінства, гэта дарагое для мяне месца. Рады паўдзельнічаць у праекце, які папулярызуе мой горад і выдатных, таленавітых землякоў», — распавёў Андрэй Анатольевіч.
Балабін збіраецца рэканструяваць дом, вярнуць яму гістарычнае аблічча.
«У маіх мэтах — перадаць абноўлены дом-музей роднаму гораду. Планавы тэрмін: 26 лістапада 2020 года да 90-годдзя з дня нараджэння пісьменніка», — удакладніў бізнэсмэн.
Балабін — ураджэнец Оршы. Ён адвучыўся ў аршанскай СШ №7, пасля скончыў Мінскае сувораўскае ваеннае вучылішча і паступіў у Мінскае вышэйшае інжынернае зенітна-ракетнае вучылішча.
У рэйтынгу самых паспяховых і ўплывовых бізнэсменаў Беларусі ён займае 133-е месца. У найлепшыя гады Балабін уваходзіў у топ-30 бізнэсменаў.
Балабін — намеснік старшыні Беларускай федэрацыі баскетбола. Фота: Аляксандр Карсакоў, Tut.by
Раней дом, дзе Уладзімір Караткевіч напісаў аповесць «Дзікае паляванне караля Стаха», дзе гасцявалі Бураўкін і Барадулін, належаў сям'і пляменніцы пісьменніка. Апошнім часам у ім жыў яе муж Юрый Барабаш. Пасля яго смерці дом перайшоў дачцэ, але яна жыве ў Адэсе.
Яна выставіла дом на продаж за 33 832 рублі, аднак Балабіну ўдалося купіць за менш як утрая. Кошт угоды — каля 10800 рублёў.
