Папярэдне запланавана, што ў сакавіку 2020 года зборная Беларусі па футболе правядзе паўфінальны матч дывізіёна D Лігі нацый супраць зборнай Грузіі. Наша каманда згуляе ў гасцях.
фота Pressball.by
У іншым паўфінальным матчы пазмагаюцца Македонія і Косава.
Праз некалькі дзён пераможцы гэтых дзвюх сустрэч згуляюць паміж сабой фінал дывізіёна D — менавіта гэтая каманда трапіць на Еўра-2020. Дзе будзе праводзіцца матч, вырашыць лёсаванне.
Склад гэтых пар (Грузія — Беларусь і Македонія — Косава) сфарміраваўся па выніках груповага раўнда дывізіёна D Лігі нацый. Кожная з пералічаных зборных абагнала трох супернікаў. Каўказцы перамаглі ў сваёй групе найбольш пераканаўча, беларусы — найменш упэўнена.
Матчы з Грузіяй, а пасля, спадзяемся, з Македоніяй ці Косава — унікальная магчымасць для беларускіх футбалістаў трапіць на чэмпіянат Еўропы упершыню ў гісторыі. Зрэшты, ніводзін з нашых супернікаў таксама не ўдзельнічаў у топ-турнірах.
Апроч таго, у сакавіку — лістападзе 2019 года пройдзе звычайная кваліфікацыя на Еўра-2020. Лёсаванне адбудзецца 2 снежня. У адборачным турніры беларусам будуць супрацьстаяць нашмат мацнейшыя зборныя за тыя, з якімі давялося гуляць у Лізе нацый.
Тэарэтычна магчыма, што Беларусь, Грузія, Македонія ці Косава гарантуюць сабе месца на чэмпіянаце Еўропы па выніках гэтай кваліфікацыі.
Тады іх месцы ў запланаваных паўфіналах Лігі нацый зоймуць іншыя зборныя (замест Беларусі — Люксембург, замест Грузіі — Казахстан, замест Македоніі — Арменія, замест Косава — Азербайджан). У такім разе паўфінальныя пары могуць быць змененыя.
