Генадзь Давыдзька. Фота Волі Афіцэравай.
Кіраўнік «Белай Русі», былы старшыня Белтэлерадыёкампаніі Генадзь Давыдзька ў нашаніўскай відэапраграме «Ток» расказаў пра сваё стаўленне да прастытуцыі.
— У час вашага дэпутацтва вы адзначыліся вельмі скандальнай заявай. Я нават не ведаю, як вы адважыліся, улічваючы, што вельмі рэдка нешта скандальнае можна пачуць ад нашага парламенту. Вы выказаліся за легалізацыю прастытуцыі. Хачу вас спытаць, ці па-ранейшаму вы падтрымліваеце такі тэзіс?
— Я падтрымліваю здаровы сэнс. Я вывучаў гэтую праблему. Добра, давайце не будзем паважаць Нідэрланды, дзе 6% ВУП ад легалізаванай прастытуцыі, напрыклад. Я размаўляў з ахвярамі гэтай, так скажам, «прафесіі» ў Мінску, у Брэсце, яшчэ дзесьці. «Як вы жывяце? Чаго вы хочаце?» Бо ўсе гэтыя звесткі пра тое, што «мы змагаемся з гэтай з’явай», «гэта дрэнна» — яны пустыя. Хто змагаецца? Як змагаецца? Яна існуе і будзе існаваць. І толькі гэтыя бедныя дзяўчаткі не ахоўваюцца ніяк. Потым грошы вялізныя, якія круцяцца там, яны заўсёды ў цень сыходзяць. У нейкі чорны цень. Гэта варта было зрабіць.
— Вас падтрымаў хоць хтосьці ў парламенце?
— У калідорах амаль усе. А ў Авальнай зале хто ж падтрымае? «Ды вы што? Гэта ж амаральна!» Але, арганізаваная… я не ведаю, што цяпер пра гэта казаць. Я лічыў гэта мэтазгодным, каб ахоўваць гэтых дзяўчатак, па-першае. Па-другое, даць грошы ў казну.
— Пра парнаграфію ў вас таксама была вельмі скандальная заява. Зараз, можа быць, недакладна працытую, што «лепш, калі бацька пасадзіць каля сябе дзіця ў даволі малым узросце, пакажа яму ўсё гэта…»
— Гэта ў спрэчках, у эмацыйных спрэчках, як, напрыклад, зараз з вамі, я магу выказаць нейкую метафару, за якую потым можна будзе зачапіцца.
— Гэта прагучала ледзь не як «вось трэба з дзецьмі глядзець порнафільмы».
— Я кажу тое, што трэба быць шчырым. Вы ж за шчырасць? Трэба быць шчырым. І, канечне, я не рабіў так з уласнай дачкой. І не трэба гэтага рабіць. Недзе «ў сэрцах» для эпатажу я, можа, гэта і крыкнуў.
