37-гадовы мінчук скраў і прайграў зберажэнні 59-гадовай каханай агульнай сумай 20 тысяч рублёў, паведамляе Следчы камітэт.
Раней судзімы 37-гадовы ўраджэнец Мінска са снежня 2017-га па кастрычнік 2018 году жыў з 59-гадовай жанчынай у кватэры на вуліцы Філімонава.
За час сумеснага пражывання ён на розных падставах неаднаразова пазычаў грошы ў жанчыны. Пры гэтым загадзя не збіраўся іх аддаваць. За гэты час мужчына завалодаў сумай больш за 5 тысяч.
У кастрычніку жанчына з'ехала пагасціць да дачкі за мяжу і пакінула ключы ад сваёй кватэры каханаму, каб ён жыў там і паліваў кветкі. Мужчына скраў з кватэры ўсе зберажэнні на агульную суму больш за 15 тысяч. Грошы марнаваў у ігральных установах.
Мужчыну прад'явілі абвінавачванне па ч. 3 арт. 205 КК (крадзеж, учынены паўторна, у буйным памеры), ч. 2 арт. 209 КК (махлярства, учыненае паўторна).
