Каля 170 мігрантаў, мусіць, загінулі ў Міжземным моры пасля таго, як два караблі патанулі па дарозе з Лівіі і Марока ў Еўропу.
Пра гэта паведамляе Deutsche Welle.
Тры мігранты, якіх выратаваў італьянскі флот, паведамілі, што 120 чалавек былі на караблі, што патануў у пятніцу. Большасць пасажыраў былі з Заходняй Афрыкі.
Карабель выйшаў з берагоў Лівіі ў чацвер вечарам і пачаў тануць прыкладна праз 10—11 гадзін. На борце былі дзесяць жанчын і двое дзяцей, астатнія — мужчыны.
Лівія адправіла гандлёвы карабель у раён, дзе затанула судна з мігрантамі, але яму не ўдалося нікога знайсці.
Яшчэ 53 мігранты, якія пакінулі Марока ў кірунку Іспаніі, таксама, мабыць, загінулі.
У мінулым годзе каля 2297 мігрантаў загінулі або прапалі ў Міжземным моры, а 116 959 чалавек дасягнулі Еўропы марскім шляхам.