Магчымы продаж Мінскага завода колавых цягачоў старшыня Дзяржкамваенпрама Беларусі Раман Галоўчанка назваў пустымі дадумкамі, піша Tut.by.
— Хачу развеяць увесь туман над гэтай сітуацыяй. Ніякіх размоў аб продажы, адчужэнні або абмене не вядзецца. Перамовы аб продажы абмяркоўваліся нейкі час таму, але яны былі закрыты ў сілу абставінаў. Цяпер яе ніхто не педалюе. Не варта прывязваць кан'юнктурныя рэчы да працы МЗКЦ, - заявіў ён.
Каментуючы візіт расійскага пасла на завод МЗКЦ Раман Галоўчанка адзначыў, што Міхаіл Бабіч наведваў прадпрыемства ў рамках сваёй дзейнасці як пасла. «Таму ён павінен знаёміцца з асноўнымі прадпрыемствамі якія працуюць у краіне яго акрэдытацыі і пастаўляюць сваю прадукцыю ў Расію», — растлумачыў кіраўнік Дзяржкамваенпрама.
Па словах Рамана Галоўчанкі, расійскаму паслу была паказана тэхніка і абсталявання на якім яна вырабляецца і расказана, на якіх умовах яна пастаўляецца.
— Міхаіл Бабіч высока ацаніў узровень прадпрыемства. Але ніякіх таргоў не адбываецца — усё гэта пустыя домыслы на фоне нашай працы з расійскімі партнёрамі, - падкрэсліў Раман Галоўчанка.
Таксама старшыня Дзяржкамваенпрама адзначыў, што заказы на прадпрыемстве ёсць да 2025 года. Гэта шасі для СПА, браневікі і іншая тэхніка — МЗКЦ дыверсіфікуе пастаўкі і асвойвае новыя сегменты.
Нагадаем, 21 студзеня пасол Расіі ў Беларусі Міхаіл Бабіч наведаў МЗКЦ. Пасля гэтага шэраг аналітыкаў выказалі здагадку, што Масква, скарыстаўшыся фінансавымі цяжкасцямі Мінска з-за падатковага манеўру ў расійскай нафтавай галіне, распачне чарговую спробу купіць Мінскі завод колавых цягачоў.
