Расійскі прапагандыст Дзмітрый Кісялёў упэўнены, што суд у Германіі ўтаіў сапраўдную крыніцу інфармацыі аб дзейнасці яго пляменніка Сяргея на Данбасе. Пра гэта ён распавёў радыёстанцыі «Говорит Москва».
У матэрыялах судовага пасяджэння значылася, што ўлады вырашылі праверыць дзейнасць грамадзяніна Германіі Сяргея Кісялёва пасля таго, як Дзмітрый Кісялёў у красавіку 2016 года абмовіўся аб удзеле пляменніка ў ваенных дзеяннях на паўднёвым усходзе Украіны.
«Пра тое, чым займаўся Сяргей, было вядома і без майго інтэрв'ю. Яны проста не хочуць раскрываць свае крыніцы. Гэта звычайная гісторыя, тут няма нічога новага. Мы прывыклі да хейтарскіх заўваг. У нас моцны імунітэт супраць гэтага», — адзначыў прапагандыст.
У чацвер, 28 лютага, Сяргея Кісялёва прысудзілі да двух гадоў і трох месяцаў турмы.
