Асноўным кандыдатам на пасаду пасла Расіі ў Беларусі стаў член Савета Федэрацыі Дзмітрый Мезенцаў. Пра гэта РБК распавяла крыніца, блізкая да адміністрацыі прэзідэнта Расіі, пацвердзіў іншы суразмоўца, блізкі да Крамля, і крыніца ў Дзярждуме. Суразмоўца РБК, блізкі да МЗС Беларусі, сказаў РБК, што Мезенцаў з'яўляецца адным з кандыдатаў на пасаду пасла ў Мінску, пра гэта ж паведаміла крыніца ў Савеце Федэрацыі.

Дзмітрый Мезенцаў, фота: kremlin.ru.

Дзмітрый Мезенцаў, фота: kremlin.ru.

Сам Мезенцаў у аўторак не адказаў на тэлефанаванні РБК.

Мезенцаў заменіць у Мінску Міхаіла Бабіча, які быў прызначаны кіраўніком дыпмісіі ў 2018 годзе і атрымаў таксама пасаду спецыяльнага прадстаўніка прэзідэнта Расіі па развіцці гандлёва-эканамічных стасункаў з Беларуссю. Ці захавае новы пасол статус спецпрадстаўніка прэзідэнта, суразмоўцы РБК не сказалі.

Адна з крыніц, блізкіх да Крамля, сказала РБК, што асноўнай прычынай замяніць расійскага пасла ў Мінску сталі рэгулярныя скаргі Аляксандра Лукашэнкі на Бабіча.

Дзейнасцю Бабіча былі незадаволеныя і ў расійскім МЗС, раней распавядала блізкая да МЗС Расіі крыніца РБК. «Бабіч дамогся статусу спецпрадстаўніка прэзідэнта, што давала яму прамы выхад на прэзідэнта і яго адміністрацыю. Нярэдка ён вырашаў задачы ў абыход МЗС, не ўзгадняючы з ім свае дзеянні, што не магло не раздражняць МЗС», — казаў суразмоўца РБК.

Канчатковае рашэнне пра замену пасла, хутчэй за ўсё, было прынята пасля сустрэчы «на нагах» Уладзіміра Пуціна і Лукашэнкі ў рамках форуму «Адзін пояс — адзін шлях» у Пекіне, кажа другі блізкі да Крамля суразмоўца РБК.

У пасольстве Расіі ў Беларусі ад каментароў РБК адмовіліся.

Пра хуткую адстаўку Бабіча паведаміла 30 красавіка газета «Камерсант» і пацвердзілі дзве крыніцы РБК.

Мезенцаў увайшоў у склад Савета Федэрацыі з 2015 года (ад выканаўчай улады Сахалінскай вобласці), яго паўнамоцтвы як сенатара скончацца ў верасні 2019 года.

Да таго, як стаць сенатарам, Мезенцаў быў генеральным сакратаром Шанхайскай арганізацыі супрацоўніцтва (ШАС). Ён таксама быў губернатарам Іркуцкай вобласці.

Клас
Панылы сорам
Ха-ха
Ого
Сумна
Абуральна