У Гродне спроба 10-гадовай дзяўчынкі зняць відэа з акна шматпавярховіка выклікала пярэпалах, паведамляе БЕЛТА са спасылкай на Кастрычніцкі РАУС Гродна.
Раніцай 3 мая ў дзяжурную службу РАУС ад дыспетчара хуткай дапамогі паступіла паведамленне, што з акна трэцяга паверха па вуліцы Кляновай выпала дзіця. На месца неадкладна выбылі супрацоўнікі міліцыі, аднак інфармацыя не пацвердзілася.
«Раніцай 10-гадовая дзяўчынка збіралася ў школу. Яе мама была на працы. Зірнуўшы у акно, дзяўчынка ўбачыла, што на пляцоўцы ля школы ідзе канцэрт. Яна вырашыла зняць яго на відэа і даслаць маме», — распавялі ў міліцыі.
Дзяўчынка забралася на падаконнік, высунула руку ў акно і стала здымаць. Але відэа цалкам не адправілася. Жанчына ўбачыла толькі руку дачкі за акном.
Тэлефон школьніцы быў недаступны. Маці захвалявалася і патэлефанавала бабулі школьніцы, тая набрала 103. Неўзабаве высветлілася, што з дзяўчынкай усё ў парадку.
