На мінулым тыдні ў тэлеграме, то тут, то там сталі праслізгваць паведамленні, што былі затрыманыя аўтары аднаго з прарасійскіх тэлеграм-каналаў, які працуе на беларускую аўдыторыю. Мы не будзем называць гэты тэлеграм-канал, бо аўтары якраз і хацелі рэкламы, але ў выніку нічога не атрымалі.
Самі пра сябе гэтыя аўтары калісьці напісалі, што адзін з іх працуе выкладчыкам, а другі — дзяржаўным служачым. Насамрэч усё гэта можа быць фэйкам.
У незалежныя СМІ закідвалася інфармацыя, што супрацоўнікі КДБ арыштавалі аўтараў тэлеграм-канала. Маўляў, ім пагражае да 5 гадоў зняволення. Праўда, ні імёнаў, ні прозвішчаў не называлася, як і артыкул КК па якім іх нібыта затрымалі.
У выніку інфармацыю пра імаверны «арышт» не даў ніводзін буйны беларускі СМІ. А праз тыдзень ажыў і сам тэлеграм-канал. Аўтары (ці аўтар?) патлумачылі, што ў дзяржаўныя ўстановы прыходзяць сілавікі ў цывільным, якія ладзяць аблаву на гаджэты. І нібыта ў такую аблаву трапіў адзін з інфарматараў канала, таму пэўны час яны замаўчалі.
Тлумачэнне, мякка кажучы, не выглядае праўдападобным. Хутчэй, гэта была спроба набраць сабе новых падпісантаў дзякуючы піяру з «арыштам». У выніку ідэя цалкам правалілася. На фэйк ніхто не павёўся.
