Рада юрыдычнага факультэта БДУ выступіла з заявай наконт дацэнта Івана Пляхімовіча. Гэта той самы выкладчык, які паскардзіўся рэктару ўніверсітэта на парадкі на факультэце.
Іван Пляхімовіч.
Чытайце. Скандал на юрфаку БДУ: выкладчык паскардзіўся, што Рыгор Васілевіч падрабіў ведамасць дзеля блатнога студэнта
Пасля гэтага Пляхімовіча не абралі па конкурсе на пасаду дацэнта. Цяпер юрфак БДУ патлумачыў, чаму так адбылося:
«11 мая 2019 года адбылося пасяджэнне кафедры канстытуцыйнага права. … Была ацэненая вучэбная, вучэбна-метадычная і навукова-даследчая работа абодвух прэтэндэнтаў. Падчас абмеркавання кандыдатуры Пляхімовіча звернута ўвага на істотныя недахопы ў яго працы. У прыватнасці, указана на шматлікія скаргі студэнтаў і бацькоў студэнтаў на прадузятае, неаб'ектыўнае стаўленне пры прыёме экзаменаў і залікаў. Студэнты і магістранты звярталіся да кіраўніцтва факультэта з заявай аб выключэнні яго з адукацыйнага працэсу, пастаянна патрабавалі, каб у іх заняткі праводзілі іншыя выкладчыкі. На заліках і экзаменах Пляхімовіч задаваў пытанні, якія не маюць дачынення да прадмета, напрыклад: «Як перакладаецца з грэцкай ваша імя? Хто напісаў такі верш, апавяданне? І гэтак далей).
Тым самым істотным чынам парушаліся правы студэнтаў. Псіхаэмацыйны стан студэнтаў пасля сустрэчы з выкладчыкам Пляхімовічам на экзамене або заліку выклікаў трывогу за іх здароўе і магчымыя наступствы для іх жыцця.
За пяцігадовы справаздачны перыяд Пляхімовічам не выдадзена ніводнага артыкула ў часопісах, вызначаных ВАК для юрыдычных спецыяльнасцяў. Як правіла, студэнты, якімі ажыццяўляў навуковае кіраўніцтва дацэнт Пляхімовіч, удзелу ў студэнцкіх канферэнцыях на юрыдычным факультэце не прымалі. Выказаны і іншыя заўвагі па яго працы.
Па рэйтынгавай сістэме ацэнкі дзейнасці выкладчыкаў БДУ Пляхімовіч мае самы нізкі паказчык на кафедры.
… Рашэнне па пытанні аб абранні на пасаду дацэнта Рада юрыдычнага факультэта прыняла 21 мая 2019 года (пратакол №8). Прэтэндэнты на пасаду мелі магчымасць выступіць перад сябрамі Рады. Па выніках таемнага галасавання: за абранне Пляхімовіча І.І. - 1 (адзін), супраць - 25 (дваццаць пяць)».